«Qazatomónerkásip» kásiporyndarynan munaı ónimderi men materıaldyq qundylyqtardy urlaǵan uıymdasqan qylmystyq top ustaldy, dep habarlaıdy Egemen.kz IIM-ge silteme jasap.
Ishki ister mınıstrliginiń úılestirýimen Túrkistan oblysy Polısııa departamenti Sozaq aýdanynda «Qazatomónerkásip» kásiporyndarynan asa iri kólemdegi janar-jaǵarmaı men basqa da materıaldyq baǵaly zattardy urlaýmen aınalysqan qylmystyq top qyzmetiniń jolyn kesti.
Qylmystyq top quramyna onnan astam adam kirgen. Onyń ishinde sottalǵandar men destrýktıvtik dinı aǵymdarǵa qatysy bar adamdar bolǵan. Olar aı saıyn on mıllıon teńge kóleminde múlik urlaýmen aınalysqan.
Sondaı-aq olar bopsalaý, kásipkerlerge «qamqorlyq jasaýmen» aınalysqan. Krımınaldyq ortada ózderiniń ustanymdaryn nyǵaıtý úshin qarý qoldana otyryp, esep aıyrysýlar jasaǵan.
«Tintýler barysynda qylmyskerlerden esirtkiler, atys qarýy, kúmándi dinı ádebıet, qylmystyq jolmen alynǵan aqshalaı qarajat, «qara býhgalterııa» bloknottary jáne «Qazatomprom» kásiporyndarynan urlanǵan materıaldyq baǵaly zattar tabyldy. Atalǵan faktiler boıynsha Qazaqstan Respýblıkasy QK-niń 197 (Munaı jáne munaı ónimderin tasymaldaý jáne satyp alý), 287 (Qarý men oq-dárilerdi zańsyz satyp alý, berý, satý jáne saqtaý) jáne 296 (Esirtki quraldarymen zańsyz is-áreket) baptary boıynsha sotqa deıingi tergep-tekserý bastaldy. Qalǵan faktiler boıynsha dálelder jınaý júrgizilýde», dep jazylǵan habarlamada.
Barlyq jedel is-sharalar prokýrordyń sanksııasymen júrgizildi, kináli adamdar ustaldy jáne sottyń sanksııasymen tergeý ızolıatoryna engizildi.