Almatyda áleýmettik jelide Ál-Farabı dańǵylyndaǵy jantúrshigerlik jol apatyna qatysty málimdemelerimen tanylǵan bloger Ádilethan Moldahanǵa qatysty sot prosesi bastaldy. Oǵan «kórineý jalǵan aqparat taratý» baby boıynsha aıyp taǵylyp otyr, dep habarlaıdy Egemen.kz.
Instagram jelisinde mıllıonnan astam oqyrmany bar bloger Ádilethan Moldahan Almatydaǵy Ál-Farabı dańǵylynda úsh adamnyń ómirin qıǵan jol-kólik oqıǵasyna qatysty jarııalanymdarynan keıin quqyq qorǵaý organdarynyń nazaryna ilikti. Ol apatqa polısııa qyzmetkerleriniń qatysy bolýy múmkin degen boljam aıtqan edi.
Bloger 31 naýryzda ustaldy. Keıin Almaty qalalyq polısııa departamenti onyń buryn quqyq qorǵaý organdarynda qyzmet etkenin, alaıda bir sebeptermen jumystan shyǵarylǵanyn habarlady. Sondaı-aq 2023 jyly tonaý faktisi boıynsha qylmystyq jaýapkershilikke tartylǵany belgili boldy.
Qazir oǵan Qylmystyq kodekstiń 274-baby 2-bóligi 3-tarmaǵy boıynsha aıyp taǵylǵan. Bul bap buqaralyq aqparat quraldary nemese telekommýnıkasııa jelileri arqyly kórineý jalǵan aqparat taratqany úshin jaýapkershilikti qarastyrady.
Is boıynsha jábirlenýshi retinde Almaty qalasy polısııa departamenti basshysynyń burynǵy orynbasary Erjan Uzabaev pen ákimshilik polısııa basqarmasynyń eks-basshysy Serik Shumaev tanylǵan. Olardyń advokattarynyń aıtýynsha, Moldahannyń jarııalanymdarynan keıin qyzmettik tekseris júrgizilip, atalǵan qyzmetkerler laýazymdarynan bosatylyp, IIM rezervine jiberilgen.
Jábirlenýshi tarap blogerden árqaısysy 11 mıllıon teńge kóleminde moraldyq jáne materıaldyq shyǵyn óndirýdi talap etip otyr.
Alǵashqy sot otyrysynda Ádilethan Moldahan óz kinásin tolyq moıyndady. Bul týraly onyń advokaty Nurtýǵan О́mirzaq málimdedi. Qorǵaýshylar bul sheshimniń blogerdiń jeke ustanymy ekenin aıtty.
Sonymen qatar qorǵaý tarapy bultartpaý sharasyn ózgertý, isti jeńildetilgen tártippen qaraý jáne medıasııaǵa ýaqyt berý týraly ótinish bildirgen. Alaıda sot ótinishti qanaǵattandyrmaı, aıyptalýshyny qamaýda qaldyrdy.
Eske salaıyq, 21 naýryzǵa qaraǵan túni Almatydaǵy Ál-Farabı dańǵyly men Meńdiqulov kóshesiniń qıylysynda bolǵan jol apatynda Mercedes kóligindegi úsh adam qaza tapqan. Apatqa sebepker boldy degen kúdikpen Zeekr kóliginiń júrgizýshisi qamaýǵa alynǵan. Tergeý málimetinshe, ol oqıǵa kezinde jeńil dárejede mas kúıde bolǵan.
Advokat Johar Ýtebekov jol-kólik oqıǵasyna qatysty pikir bildirip, belgili bir jaǵdaılarda kináli dep tanylǵan azamat úkim shyqqannan keıin shamamen 1 jyl 3 aıdan soń jazasyn jeńildetýge qol jetkizýi múmkin ekenin aıtty.
Qazirgi tańda qoǵam nazaryn aýdartqan bul is boıynsha sot prosesi jalǵasyp jatyr.