Májilistiń jalpy otyrysynda Raqymshylyq jasaý týraly zań jobasy talyqalynp jatyr. Jańa zań onyń qoldanysqa engizilgenge deıin jasalǵan quqyq buzýshylyqtarǵa ǵana qoldanylady. Iаǵnı, zań kúshine engennen keıin jasalǵan áreketter raqymshylyqqa ilikpeıdi, dep habarlaıdy Egemen.kz.
Qylmystyq raqymshylyq sheńberinde qylmystyq teris qylyqtar, onsha aýyr emes jáne aýyrlyǵy ortasha qylmystardyń jekelegen sanattary qamtylady. Bul rette keıbir sottalǵandarǵa negizgi jazanyń ótelmegen bóligin qysqartý qarastyrylǵan.
Aldyn ala esep boıynsha, qylmystyq raqymshylyq 16,5 myń adamǵa qatysty qoldanylýy múmkin. Onyń ishinde shamamen 15 myń sottalǵan jáne 1,5 myń tergeý satysyndaǵy azamat bar. Tek Ishki ister mınıstrligi jelisi boıynsha ákimshilik raqymshylyq jalpy somasy 17 mlrd teńgeden asatyn shamamen 1 mıllıon ákimshilik aıyppuldy qamtıdy.
Amnıstııa kimderge qoldanylady?
Alaıda raqymshylyq barlyq quqyq buzýshylyqtarǵa birdeı júrmeıdi. Ol qaıtalanǵan quqyq buzýshylyqtarǵa jáne sottardyń qaraýyndaǵy isterge qoldanylmaıdy.
Sonymen qatar qoǵamdyq qaýipsizdikke, azamattardyń ómiri men densaýlyǵyna qaýip tóndiretin quqyq buzýshylyqtar úshin salynǵan aıyppuldar keshirilmeıdi. Jol qozǵalysy qaýipsizdigine qatysty óreskel zań buzýshylyqtar da raqymshylyqtan tys qalady. Olardyń qatarynda mas kúıinde kólik júrgizý, esirtkilik masańdyqtaǵy júrgizýshilerdiń áreketteri, qarsy jolaqqa shyǵý jáne basqa da aýyr jol erejesin buzý faktileri bar.
Sondaı-aq qarý-jaraq pen esirtkiniń zańsyz aınalymy, densaýlyq saqtaý, sanıtarııalyq-epıdemıologııalyq qaýipsizdik jáne derbes derekterdi qorǵaý salalaryndaǵy quqyq buzýshylyqtarǵa raqymshylyq qoldanylmaıdy.
Italııa, AQSh pen Indonezııa tájirıbesi: álemdik reformalar Qazaqstandaǵy raqymshylyq jobasyna qalaı yqpal etti?
Ákimshilik raqymshylyq aıyppul salynǵan azamattarǵa qoldanylady
Qazaqstanda alǵash ret ákimshilik raqymshylyq jasaý tetigi engizilmek. Jańa norma Ákimshilik quqyq buzýshylyq týraly kodekske engiziletin ózgerister aıasynda júzege asyrylady.
Raqymshylyq ákimshilik aıyppul arqalaǵan azamattar men birqatar kásip ıelerine qatysty qoldanylady. Atap aıtqanda, onyń aıasynda jeke kásipkerler, notarıýstar, jeke sot oryndaýshylary, advokattar jáne zań konsýltanttary qamtylady.
Raqymshylyqqa iligetin azamattar qalaı tańdalady?
Jańa tártip boıynsha raqymshylyq avtomatty túrde rásimdeledi. Arnaıy aqparattyq júıe zańda kórsetilgen talaptarǵa sáıkes keletin azamattardyń tizimin qalyptastyrady. Sheshim elektrondy formatta qabyldanyp, azamattarǵa SMS-habarlama nemese sıfrlyq servıster arqyly jetkiziledi. Osylaısha, azamattarǵa raqymshylyq alý úshin memlekettik organdarǵa arnaıy baryp, ótinish berýdiń qajeti bolmaıdy.
Eske sala keteıik, búgin Májilistiń jalpy otyrysynda raqymshylyqtan bólek, keden men notarıattyq qyzmet, psıhologııalyq qyzmet, tehnıkalyq jáne kásiptik bilim berý júıesin jetildirý máselelerine qatysty zań jobalary qaralyp jatyr.