Oblystyq sanıtarlyq-epıdemııalyq baqylaý departamentiniń mamandary óńirde jyl basynan beri 586 adamnan COVID-19 anyqtalyp, sońǵy táýlik ishinde turǵyndardyń indet juqtyrý kórsetkishi 1,23%-ǵa óskenin málimdedi. Ásirese, Qostanaı men Rýdnyı qalalarynda qaýipti indettiń tyrnaǵyna ilinip, aýrýhana tósegine tańylyp jatqandar kóp.
О́ńirde túrli ınfeksııalyq aýrýlarǵa shaldyqqan naýqastarǵa arnalǵan 1 350 tósektik oryn bar. Al emdeý mekemelerinde juqpaly aýrýmen kelip túsken 300-den asa adam jatyr. Oblysta koronavırýs juqtyrǵan naýqastar jatatyn 300 karantındik tósektik oryn jeke jabdyqtalǵan. Oqshaýdaǵy emdeý oryndarynda PTR-test qorytyndysyn kútip jatqan 42 adam bar.
Oblystyq sanıtarlyq-epıdemııalyq baqylaý departamentiniń bólim basshysy Gúlim Dosymovanyń aıtýynsha, COVID-19-ǵa qosa sońǵy kezderi óńirde tez juǵatyn túrli juqpaly aýrýlar da beleń alyp barady.
– Qostanaı oblysynda bıyl JRVI-men aýyrǵandardyń sany ótken jyldyń osy kezeńimen salystyrǵanda 2,5 ese kóp. Máselen, sońǵy aptanyń ishinde mundaı 5 myńnan asa naýqas tirkelip otyr. Olardyń 60-70 paıyzy – 14 jasqa deıingi balalar. Sýyq tıgizip alǵan naýqastardyń bárine tumaýdy tańa berýge bolmaıdy. Aldymen naýqastyń dene qyzýyn ólshep, jóteliniń qandaı ekenin, tamaǵynyń isiný ereksheligin zerttep, tumaý belgilerin anyqtap alý kerek. Tumaý juqtyrǵan adamdarǵa qazirgi naýqastar sııaqty ári-beri júrýge bolmaıdy. Mindetti túrde jatyp emdelý kerek. Sondyqtan qazir aýrýlardyń árqaısysyn jiti zerttep, taldap, sosyn baryp naqty em sharalaryn qabyldaý mańyzdy, – dedi G.Dosymova.
Dáriger-mamandar turǵyndarǵa indetti tejeýdiń jalǵyz joly vaksına qabyldaý ekenin qaıtalap túsindirýde. Osyǵan oraı oblystyq densaýlyq saqtaý basqarmasy basshysynyń orynbasary Anjela Beksultanova arnaıy baspasóz jıynyn ótkizip, qaıtalap ekpe alýdyń asa mańyzdy ekenin taǵy aıtty.
– Aımaqta «Spýtnık V» birinshi komponentiniń shamamen 292 myń dozasy jáne ekinshisiniń osynsha mólsheri saqtaýly tur. Sonyman qatar 5 myńǵa jýyq «Spýtnık-Laıt» dozasy ákelindi. Buǵan qosa 400 myń doza QazVac, 65 myń doza Hayat, 28 myń doza CoronaVac jáne 230 myń Vero Cell vaksınasy bar. Pfizer Comirnaty vaksınasynyń 112 myń dozasy jetkizildi. Búginge deıin oblysta 353 065 adam birinshi komponentpen, al 334 myńnan asa adam ekinshi komponentpen vaksına aldy. Bul halyqtyń shamamen 70%-yna jýyqtaıdy. Sondaı-aq 70 803 adam qaıta vaksına qabyldady, – dedi A.Beksultanova.
Aımaqta epıdemııalyq ahýaldyń kúrdelene túsýine qaramastan, óńirde shaǵyn jáne orta bıznes ókilderine, Ashyq jobasyna qatysatyn ózge de mekemelerge karantındik shekteý talaptarynyń birshama jeńildetilgenin de aıta ketken jón. Máselen, «kók» mártebesi bar turǵyndar buǵan deıin iri saýda oryndaryna demalys jáne mereke kúnderi kire almaıtyn. Endi mundaı saýda nysandaryna «kók» te, «jasyl» da jiberiletin boldy.
Jalpy, álemdi qursap tastaǵan qaýipti indet bastalǵan eki jylǵa jýyq ýaqyt ishinde oblysta COVID-19 juqtyrǵan 48 myńǵa jýyq adam anyqtalyp, onyń 42 myńnan astamy emdelip shyqqan.
Qostanaı oblysy