Senat Spıkeri Máýlen Áshimbaevtyń tóraǵalyǵymen Palata otyrysy ótti. Otyrys barysynda senatorlar «Qazaqstan Respýblıkasynyń halyqaralyq sharttary týraly» Qazaqstan Respýblıkasynyń Zańyna ózgerister men tolyqtyrýlar engizý týraly» zańdy qarap, qabyldady, dep habarlaıdy Egemen.kz QR Parlamenti Senatynyń Baspasóz qyzmetine silteme jasap.
Zań halyqaralyq sharttarǵa qatysty zańnamadaǵy olqylyqtar men normalardyń qaıshylyǵyn joıýǵa múmkindik beredi. Sondaı-aq onda «dáıekteý», «halyqaralyq shart jasasý», «qol qoıý» jáne «ókilettikter» uǵymdary naqty anyqtalǵan.
«Qabyldanǵan zań halyqaralyq sharttardy jasasý tártibiniń jekelegen erejelerin naqtylaıdy. Sondaı-aq, halyqaralyq sharttardy jasasý aıasynda tıisti rásimderdi jetildirýdi kózdeıdi», degen Máýlen Áshimbaev osy zańdy ázirlegen Parlament depýtattaryna alǵys bildirdi.
Sonymen qatar Palata otyrysynda senator Beıbit Isabaev ant berdi. Odan bólek, birqatar depýtat Úkimetke óz saýaldaryn joldady.
Atap aıtqanda, Dáýren Ádilbekov qarapaıym jáne túsinikti tetiktermen ShOB-ty memlekettik qoldaýdyń biryńǵaı erejelerin ázirleýdi usyndy. Sondaı-aq kásipkerlerdi memlekettik qoldaýdyń biryńǵaı aqparattyq portalyn qurý týraly sóz qozǵady.
Al, Aqmaral Álnazarova tıisti ári júıeli daıyndyqsyz jáne máseleni muqııat zerttemeı jatyp AITV (VICh) ınfeksııasynyń dıagnostıkasyn básekeles ortaǵa bermeýdi surady.
О́z kezeginde Baýyrjan Qanıev elimizdiń ımportqa táýeldiligin tómendetý úshin rezervtik qorlar qurý qajettigin aıtty.
Ábdáli Nuralıev qosalqy jáne usaq sharýa qojalyqtaryna memlekettik qoldaý kórsetýdi arttyrýdyń mańyzdylyǵyna nazar aýdardy.
О́z saýalynda Nurlan Beknazarov turǵyn úıdi jalǵa alý úshin ótemaqy ala alatyn ishki ister organdary qyzmetkerleriniń tizbesin keńeıtý máselesin kóterdi.
Nurlan Bekenov elektr jáne jylý energııasynyń tapshylyǵyna baılanysty Kókshetaýda JEO qurylysyn jedeldetýge shaqyrdy.