Mólt etken mahabbat

«Seni súıý – álemge mań­daıdan nur taratý», deıdi belgili aqyn Tynyshtyqbek Ábdikákim. Shynymen asqaq sezimniń aıasynda kúnniń ózi kóleńkeleıtindeı, tipti ǵashyq jan alapat órtti bir tamshy sýmen óshirýge qaý­qarly. Teńizdiń arǵy betine qaıyqsyz qulash sermegendeı janyńyzdy jasampaz jiger bıleıdi. Sol áserdiń áýenine elitken atyraýlyq jas sýretshi Rafael Sle­kenov «Alǵashqy súıý» kartınasyn jazady. Bul onyń qyrmyzy gúlge toly myń boıaýly álemi.

Qylqalam sheberi óz kartınalaryn japondyq mýltıınstrýmentalıst Kı­taronyń medıtasııalyq mýzykasyna boılaı otyryp jazyp, ıdeıalaryn jetildiredi eken. Sodan da bolar onyń oılaý keńistigi ózgeshe. Má­selen, ol óz stılin «djaz kes­kindeme» nemese «avangard» dep ataıdy. Budan qa­zaq beıneleý ónerindegi jas býyn ókilderiniń kartına jazýdaǵy erkindigi, qylqalam ustaýdaǵy sheber­ligi, árqaısysynyń ózindik pikiri qalyptasyp kele jat­qanyn baıqaýǵa bolady. Ási­rese taqyryp tańdaýdaǵy je­tis­tigi orasan.

Jas sýretker burynǵy keńestik kezeńniń kanondarynan bas tartyp, zamanǵa saı táýelsiz taqyryptarǵa baryp, jańa baǵytqa bet burdy. Bul úrdis qazaq óne­riniń rýhanı ereksheligin joǵaltpaı, qaıta ónerdiń qaıtalanbas plastıkalyq tilin qalyptastyrdy. Sen­beseńiz, avtordyń shy­ǵar­ma­shylyǵyna úńilseńiz bolady. Biz mysalǵa alǵan týyndyda shyǵys sýret ónerine tán detaldar kez­desedi.

Gúlzar baq ishinde burala bılegen qos ǵashyqtyń aınalasy tolǵan raýshan gúli. Aq pen qyzyl tústerdiń ózara baılanysy, kók túspen shekaralasyp shyǵarmanyń ın­tererin baıytyp tur. Bul boıaýlar jastyq shaqtyń asaýlyǵyn, tazalyǵyn sıpattaıdy. Bozbala men boı­jetkenniń mólt etken ma­hab­batynan jaralǵan kom­po­zısııa kóńil elitip qana qoımaı, júrekke jylý uıa­latady.