Jeksenbi kúni Beıjińde ótip jatqan XXIV Qysqy Olımpııa oıyndarynda taǵy jeti júlde jıyntyǵy sarapqa salyndy. Jarys jolyna snoýbordshylar (sloýpstaıl, áıelder), shańǵyshylar (skıatlon, erler), taý shańǵyshylary (erler), konkıshiler (5000 metr, erler), shańǵymen tramplınnen sekirýshiler (K-78, erler), frıstaılshylar (mogýl, áıelder) jáne shanashylar (erler) shyqty.
Frıstaılshy Iýlııa Galyshevanyń jarys jolyna shyǵýyn barsha qazaqstandyq jankúıerdiń taǵatsyzdana kútkeni jasyryn emes. Sebebi ol bizdiń osy dodadaǵy basty úmitimiz edi. 29 jastaǵy Shyǵys Qazaqstan oblysy týmasynyń buǵan deıin de baǵyndyrǵan belesteri bir tóbe. Onyń álem chempıony, álem chempıonatynyń birneshe dúrkin júldegeri, Azııa oıyndarynyń úsh dúrkin jeńimpazy, Dúnıejúzilik Ýnıversıadanyń eki dúrkin jeńimpazy jáne basqa da tolyp jatqan ataqtary bar. 2018 jyly Ońtústik Koreıanyń Phenchhan qalasynda alaýy tutanǵan Olımpııa oıyndarynda Qazaqstan qurama komandasynyń qorjynyna jalǵyz medaldy salǵan da dál osy sportshy.
Beıjińdegi jarystyń bastapqy satylarynda táýir óner kórsetken Galysheva «TOP-12» frıstaılshynyń qatarynan kórinip, óz kórermenderin bir jelpindirip tastaǵan edi. Biraq odan árige Iýlııanyń shamasy jetpedi. Ekinshi fınalda nebári 49.74 upaı jıǵan ol úzdik altylyqtyń sanatyna qosyla almady. Nátıjesinde, júldeli oryndar úshin talasý múmkindiginen aıyrylyp, Beıjiń Olımpıadasyn 11-orynmen qorytyndylady.
Frıstaıl-mogýldan ótken jarysta 23 jastaǵy Aýstralııanyń arýy Djakara Entonı altynnan alqa taqty. Dál osy sportshynyń Phenchhandaǵy oıyndarda jeńis tuǵyryna synyq súıem jetpeı súrinip, tórtinshi orynǵa turaqtaǵany esimizde. Bul joly Djakaranyń juldyzy jarqyrady. Amerıkalyq Djelın Kaýf kúmis alsa, reseılik Anastasııa Smırnova qola medaldy moınyna ildi.
Shańǵyshylardyń skıatlon túri boıynsha reseılik Aleksandr Bolshýnov aldyna jan salmady. Brıanskiniń týmasy osydan tórt jyl buryn Phenchhanda qansha talpynǵanymen, bas júldege qol jetkize almaǵan edi. Sary qurlyqta ótken Olımpıadany ol 3 kúmis jáne 1 qolamen qorytyndylady. Bul joly 25 jastaǵy Bolshýnovtyń baǵy janyp, altyn tuǵyrdan qol bulǵady. Aleksandrdyń komandalyq áriptesi, úsh dúrkin Olımpııa oıyndarynyń júldegeri Denıs Spısov kúmispen kúptelse, Sochı men Phenchhan Olımpıadalarynyń jeńimpazy, álem chempıony, fınlıandııalyq Iıvo Nıskanen qola medaldy qanaǵat tutty. Qazaqstandyq Vıtalıı Pýhkalo 32-orynda qalyp qoısa, Evgenıı Velıchko jarys jolynan shyǵyp qaldy.
Konkıshilerdiń saıysynda Nıderlandtyń jigitteri jasyndaı jarqyldady. Álemniń eki dúrkin chempıony Nıls van der Pýl bas júldeni oljalasa, Patrık Rýst ekinshi orynǵa taban tiredi. Úshinshi satyǵa norvegııalyq Hallgeır Engebroten jaıǵasty. Snoýbordta Jańa Zelandııanyń ókili Hallgeır Engebroten jeńiske jetse, amerıkalyq Djýlııa Marıno men aýstralııalyq Tess Koýdı júldegerler qatarynan kórindi.
Shańǵymen tramplınnen sekirýde Japonııanyń juldyzy Reıý Kobaıasıdiń aldyna eshkim túse almady. Aýstrııalyq Manýel Fettner ekinshi jáne polshalyq Davıd Kýbaskı úshinshi oryndardy enshiledi. Qazaqstandyq Sergeı Tkachenko men Danıl Vasılev syn saǵatta bilgenderinen jańylyp, kósh sońynda qalyp qoıdy. Shana sportynda germanııalyq Iohannes Lıýdvıgke teń keler eshkim tabylmasa, odan keıingi oryndarǵa aýstrııalyq Volfgang Kındl men ıtalııalyq Domınık Fıshnaller turaqtady.
Keshe mánerlep syrǵanaýdan komandalyq jarys óz máresine jetip, Reseı quramasy bas júldeni jeńip aldy. Bul komanda sapynda Mark Kondratıýk (erlerdiń jekelegen saıysy), Anastasııa Mıshına men Aleksandr Gallıamov (juptyq saıys), Vıktorııa Sınısına men Nıkıta Kasalapov (muzdaǵy bı), Kamıla Valıeva (áıelderdiń jekelegen saıysy) syndy sańlaqtar óner kórsetti. Kúmis medal AQSh-qa buıyrsa, Japonııa qola júldeni ıemdendi.
Beıjiń Olımpıadasynda ázirge 18 eldiń órenderine júlde alý baqyty buıyrdy. Kósh basynda – Reseı sportshylary. Olar túrli-tústi medaldardyń árqaısynan eki-ekiden ıelenip otyr. Ekinshi jáne úshinshi oryndardy Norvegııa men Shvesııa ózara bólisýde. Skandınavııa túbeginde ornalasqan qos memleket ókilderi eki altynnan oljalady. Oǵan qosa norvegııalyqtardyń taǵy bir qolasy bar. Tórtinshi jáne besinshi satylarǵa Germanııa men Nıderland jaıǵasty. Bul elderdiń sportshylary 1 altyn men 1 kúmisten enshileýde. Altynshy orynda – Japonııa. Kúnshyǵys eliniń órenderi 1 altyn men 2 qolany oljalady. Jetinshi jáne segizinshi oryndar Aýstralııa men Slovenııaǵa tıesili. Olardyń qorjynynda 1 altyn men 1 qola medal bar. Úzdik ondyqty bas júldeni bir-birden ıelengen Qytaı men Jańa Zelandııanyń ókilderi túıindep tur.