Alaıaqtar qaıyrymdylyq uıymdarynyń biryńǵaı tizilimin paıdalanyp, qazaqstandyqtarǵa nesıe rásimdemek bolǵan. Búginde 400-den astam ótinish tústi. Bul týraly «Qazaqstan halqyna» qorynyń baspasóz qyzmeti málimdedi, dep jazady Egemen.kz.
Qor málimetinshe, tek demalys kúnderi ǵana «Atameken» UKP baılanys ortalyǵyna osyndaı shaǵymmen 250 adam júginse, dúısenbi, 7 aqpanda osy tektes taǵy 186 qońyraý túsken.
Baspasóz qyzmeti málimetinshe, Shymkent qalasynyń turǵyny kómek alýǵa ótinim toltyrǵannan keıin ekranda nesıe sátti óńdelgeni týraly aqparat shyqqanyn, odan ári aqshalaı nesıeni alý týraly usynyspen beıne qońyraý túskenin aıtqan.
«Mundaı oqıǵa О́skemende de boldy. Ol jerde qala turǵynyna jalǵan elektrondyq úkimet portalynan SMS-habarlama kelgen. Sodan keıin alaıaq telefon arqyly 1 166 000 teńge kómek qarajatyn jiberý úshin SMS-kodty suraǵan», dedi qordyń baspasóz qyzmeti.
Qordyń baspasóz qyzmeti qazaqstandyqtarǵa tek resmı aqparatqa ǵana sený kerek ekenin eskertti.
«Qor messendjerler arqyly beıne nemese aýdıo qońyraýlar jasamaıdy. Jalǵyz baılanys - qazaqstanhalqyna.kz saıty jáne qaıyrymdylyq uıymdarynyń biryńǵaı tizilimi. Biz azamattardy qaýesetterge senbeýge jáne alaıaq uıymdardyń arandatýyna túsip qalmaýǵa shaqyramyz. Tek resmı aqparatqa senińiz», dedi qordyń resmı ókili Álibek Ábdilov.