Qazaqstanhalqyna.kz saıty iske qosylǵannan beri «Qazaqstan halqyna» qoryna 13 myńnan astam ótinish kelip túsken. Bul týraly «Qazaqstan halqyna» qorynyń baspasóz qyzmeti málimdedi, dep jazady Egemen.kz.
Qazirgi tańda qorda 115 mıllıard teńgeden astam qarajat jınaqtalǵan. Shuǵyl áreket etýdi talap etetin máseleler boıynsha saraptamalyq komıtetter jumysqa kirisken.
Qordyń baspasóz qyzmeti, saıt pen áleýmettik jelidegi messendjerlerge úı satyp alý, nesıe jáne basqa da qarjylyq zaımdar boıynsha mindettemelerdi tóleý, otbasylyq is-sharalar men merekelik sharalardyń qarajatyn óteý mazmunyndaǵy ótinishter de túsip jatqanyn jetkizdi.
Aıta keteıik, qamqorshylyq keńes «Qazaqstan halqy» qorynyń negizgi mindetterin aıqyndaıtyn tujyrymdamany bekitti.
Osylaısha, qujatqa sáıkes, qordyń qyzmeti bolashaqta aýrýlardyń jáne múgedektiktiń yqtımal damýyn boldyrmaý maqsatynda sábılerge medısınalyq qyzmet kórsetýdi damytýǵa jáne onyń qoljetimdiligin arttyrýǵa járdemdesýge, sport jáne bilim berý ınfraqurylymy, sondaı-aq balalarǵa arnalǵan basqa da áleýmettik mańyzy bar qyzmetterdiń qoljetimdiligin arttyrýǵa baǵyttalady.
Sondaı-aq qor múgedek, naýqas nemese áleýmettik beıimdelý problemalary bar balany asyrap alǵan, qamqorlyǵyna alǵan nemese patronattyq tárbıeni uıymdastyrǵan otbasylarǵa kómek kórsetýmen jáne az qamtylǵan otbasynyń balalaryna kómek kórsetý úshin mekteptermen ózara is-qımyl jasaıdy.
Sonymen qatar tizimge Qazaqstannyń aýmaqtyq tutastyǵy men qaýipsizdigin qorǵaý nemese adamdardyń ómirin saqtap qalý jáne zardap shekken turǵyndarǵa kómek kórsetý kezinde qaıtys bolǵan nemese aýyr jaraqat alǵan quqyq qorǵaý organdary, arnaıy organdar, UQK qyzmetkerleriniń otbasylaryna, áskerı qyzmetshilerge, tótenshe jaǵdaılar kezinde zardap shekken adamdarǵa qoldaý kórsetý qyzmeti kiredi.
«Atalǵan qyzmet baǵyttaryn Qamqorshylyq keńes bekitti, al basqa salalar Qor qyzmetindegi basym baǵyttarǵa jatpaıdy. Sondaı-aq biz azamattardyń qarjylyq problemalary baryn túsinemiz. Alaıda bul máselelerdiń barlyǵyn qor sheshe almaıdy. Sondyqtan qor turǵyndardan tujyrymdamada kórsetilgen qyzmet baǵyttaryn muqııat oqyp shyǵýdy suraıdy», dedi «Qazaqstan halqyna» qorynyń resmı ókili Álibek Ábdilov.