Byltyr elimizde Indýstrııalandyrý kartasy aıasynda 144 joba iske qosyldy. Jobalardyń jalpy quny 1,3 trln teńgege teń. Bul rette óndiris oshaqtarynda 12,9 myń turaqty jumys orny qurylǵan.
Júzege asyrylǵan jobalardyń basym bóligi tamaq ónerkásibine tıesili – 41 joba. Qurylys ındýstrııasynda 26 joba qatarǵa qosylsa, mashına jasaý salasynda 18 joba júzege asyrylǵan. Jobalardyń 16-sy metallýrgııaǵa, 10-y hımııa ónerkásibine tıesili. Jeńil ónerkásipte 8 joba iske qosylsa, aǵash óńdeý salasynda 3 joba paıdalanýǵa berildi. Sondaı-aq munaı óńdeý salasynda 3 joba, farmasevtıkada 1 joba, energetıkada 12 joba qatarǵa qosyldy. 6 joba ózge salalardyń úlesinde.
Jobalardyń basym bóligi Shyǵys Qazaqstan, Qaraǵandy, Jambyl oblystarynda, sondaı-aq Shymkent, Nur-Sultan jáne Almaty qalalarynda ornalasqan.
Iske qosylǵan jobalardyń ishindegi eń irisi – Qaraǵandy oblysyndaǵy «Jáırem KBK» AQ baıytý fabrıkasynyń qurylysy jáne jumys istep turǵan óndiristi jańǵyrtý jobasy. Zamanaýı polımetall baıytý fabrıkasynyń qýattylyǵy jylyna 5 mln tonnaǵa jýyq kendi óńdeýge múmkindik beredi. Munda zamanaýı tehnologııalar qoldanylady. Bul degenimiz – jańa karer, sıfrlandyrýdyń joǵary dárejesi bar tolyq avtomattandyrylǵan fabrıka jáne ınnovasııalyq jabdyqtar. 400-ge jýyq qosymsha jumys orny ashyldy. Ken baıytý kombınaty Qazaqstandaǵy myrysh jáne qorǵasyn konsentrattarynyń eń iri óndirýshisi bolady dep kútilýde.
Iri jobalardyń qataryna KAZ Minerals Aktogay JShS-niń qoldanystaǵy sýlfıdti fabrıkany qaıtalaý arqyly Aqtoǵaı ken baıytý kombınatynyń qaıta óńdeý qýatyn keńeıtý jobasyn jatqyzýǵa bolady. Bul joba 2017 jyly KAZ Minerals kompanııalar tobynyń ındýstrıaldy-ınnovasııalyq damý memlekettik baǵdarlamasyn júzege asyrý aıasynda bastaldy. Kombınattyń ekinshi kezegin iske qosý ken óńdeýdi jylyna 25 mln tonnadan 50 mln tonnaǵa deıin arttyrýǵa múmkindik beredi. 2022 jyldan bastap ken ornynda 190 myń tonna mys, onyń ishinde 20 myń tonna katodty mys óndiriledi dep josparlanýda. Kásiporynda aldyńǵy qatarly tehnologııalar, atap aıtsaq, jasandy ıntellekt negizindegi baǵdarlamalar belsendi qoldanylady.
Qaz Carbon JShS-niń Qaraǵandy oblysynda aglomerasııalyq fabrıkasy bar Saryarqa ferroqorytpa zaýytyn salý jobasyn da bóle-jara atap ótýge bolady. Kásiporynnyń ereksheligi – munda suranysqa ıe ónimdi qysqa merzimde shyǵarýǵa beıimdelgen jabdyqtar bar. Avtomattandyrý, jańa tehnologııalar adam faktoryn barynsha azaıtýǵa múmkindik berdi. Barlyq pesh óndiristi basqarý ortalyǵynan basqarylady, operatorlar beınekameralar arqyly tehnologııalyq prosesti baqylaıdy. Munda ónimniń 8 túri bar. Olar Nippon Steel, Marubeni Corporation, «ArselorMıttal» (Lıýksembýrg) sııaqty sheteldik alyptardyń suranysyna ıe. Eksport geografııasy Japonııa, Reseı, Eýropa elderi men TMD-ny qamtıdy.
Qatarǵa qosylǵan qýatty jobanyń biri – «Petropavl elektr tehnıkalyq zaýyty» JShS-niń transformatorlar óndirisi. Zaýyt 6, 10, 35 kV kerneý klasyndaǵy taratý transformatorlary men joǵary voltty uıashyqtar shyǵarady. Zaýyttyń óndiristik qýaty jylyna 13 myń birlik ónimdi quraıdy. Shyǵarylatyn ónimniń 98 paıyzdan astamyn TMD elderine eksporttaý josparlanýda.
Iri jobanyń biri – QazTehna JShS-niń Saran qalasyndaǵy Yutong jolaýshylar avtobýstaryn óndirý jobasy. Kásiporynnyń jalpy óndiristik qýaty Yutong brendiniń 1 200 birlik jolaýshylar avtobýsy men elektr avtobýstaryn, sondaı-aq karerlik, qurylys jáne jol tehnıkasynyń 500 birligin quraıdy. Kompanııa satyp alǵan barlyq jabdyqtar strategııalyq seriktes Zhengzhou Yutong Group Co., Ltd. kompanııasymen arnaıy ázirlengen jáne jınaqtalǵan. Qoldanylatyn jabdyq jetkilikti ıkemdilikke ıe jáne QazTehna qyzmetkerlerine bir buıymdy daıyndaýdan ekinshi buıymǵa jyldam qaıta baptaýǵa, sondaı-aq tapsyrys berýshige az mólsherde qajetti bólshekterdiń keń assortımentin óndirýge múmkindik beredi. О́ndiriletin ónimniń negizgi tutynýshylary – Qazaqstannyń kóliktik, taý-ken óndirýshi jáne ónerkásiptik kompanııalary. Bolashaqta taıaý shetelderdiń naryǵyna shyǵý qarastyrylýda.
Sondaı-aq Qyzylorda oblysynda Orda Glass JShS tabaq shyny óndiretin zaýyt tehnıkalyq turǵydan iske qosyldy. Qýaty jylyna 197 100 tonna tabaq shyny óndirý jáne óńdeýge qaýqarly shyny zaýyty Qyzylorda qalasynyń Indýstrııalyq aımaǵynda ornalasqan. Shyny kúndelikti ómirdiń kóptegen salasynda joǵary suranysqa ıe. Otandyq shyny turǵyn úı jáne kommersııalyq jyljymaıtyn múlik qurylysynda, mashına jasaýda, jıhaz jáne ınterer zattaryn óndirýde qyzmetter men taýarlardyń ózindik qunyn edáýir tómendetedi.