Bıylǵy Balalar jylyna oraı «Astana Opera» teatrynda oqýshylarǵa teatrlyq qolónerdi úıretetin shyǵarmashylyq úıirmeler ashylmaq. Bilim baǵdarlamasy Mádenıet jáne sport mınıstrligi men Nur-Sultan qalasy ákimdiginiń qoldaýymen júzege asyrylyp otyr.
Atalǵan teatrda buǵan deıin de balalarmen jumys isteýge erekshe kóńil bólinip, shyǵarmashyl jastardy tárbıeleýge jáne damytýǵa kóptegen joba ótkizilip keledi. Balalar qolóner stýdııasy – oqýshylarmen júrgizilgen keshendi jumystyń jalǵasy ispettes. Teatr bazasynda 6-dan 14 jasqa deıingi balalarǵa arnalǵan birneshe úıirme ashylady: «Kıim úlgileý, pishý jáne tigý», «Quraq quraý», «Aǵashqa órnek salý», «Keskindeme jáne sýret». Aıta keteıik, oqýǵa ótinimderdi ata-analar artsport.edu.kz biryńǵaı portaly arqyly bere alady. Úıirmelerdi teatrdyń kásibı tájirıbeli qyzmetkerleri júrgizedi.
– Memleket basshysy Qasym-Jomart Toqaev óziniń Joldaýynda atap ótkendeı, bilim sapasyn arttyrýda erte kásiptik baǵdar berýdiń mańyzy zor. О́skeleń urpaq bolashaq mamandyqty tańdaýǵa sanaly túrde qaraýy tıis. Adamnyń boıyna bitken daryny balalyq shaqta baıqalady. Úlkenderdiń mindeti – balalardyń áleýetin ashý úshin múmkindikter usyna otyra ózin tabýǵa kómektesý. О́ner álemine bastaýshy retinde teatrǵa júktelgen jaýapkershilikti túsine kele, «Astana Opera» óskeleń urpaqty qoldaý maqsatynda kóp jumys atqarýda. Segiz jyl boıy bizde hor jáne balet bólimderinen turatyn Balalar opera stýdııasy jumys isteıdi. Jas ártister tabıǵı daryndaryn damyta otyryp, mýzyka men bıdi meńgerýde teatrlyq qoıylymdarǵa eresek ártistermen qatar qatysýda. Mamandyqpen bulaı etene jaqyn tanysý olarǵa barynsha sanaly túrde tańdaý jasaýǵa múmkindik beredi, – deıdi «Astana Opera» dırektory Ǵalym Ahmedııarov.
Sondaı-aq ol teatr ujymy Mádenıet jáne sport mınıstrligi jáne elorda ákimdigimen birlesip júzege asyratyn taǵy bir aýqymdy joba – «Teatr sabaǵy» ekenin de atap ótti. Onyń qatysýshylary – joǵary synyp oqýshylary tek kórermen bolyp qana qoımaı, qoıylymnyń maǵynasyn aldyn ala túsinýge kómektesetin tanymdyq dáristerdiń tyńdaýshylaryna aınalady. Jumbaq atmosferaǵa tereńirek úńilý úshin oqýshylarǵa shymyldyqtyń arǵy jaǵyna saıahat uıymdastyrylady, onda olar grımdeý, kostıýmerlik sehtardy, mýzykalyq kitaphanany, daıyndyq zaldaryn aralap kóredi.
Jańa bilim baǵdarlamasyn oqytý barysynda teatrlyq qolónerdiń san alýan túrlerimen tanystyrý josparlanyp otyr. Balalar tańdalǵan spektaklge rekvızıt, býtaforlyq zattar men kostıýmderdi daıyndaıdy. Oqýshylardyń shyǵarmashylyq ambısııasyn qaıraý jáne yntalandyrý úshin ashyq sabaqtar men baıqaýlar uıymdastyrylmaq. Oqý jylynyń aıaǵynda balalardyń jumystary kórmede tanystyrylyp, ár oqýshy sertıfıkatqa ıe bolady.
Aıta keteıik, «Keskindeme jáne sýret» kýrsyna 6-dan 14 jasqa deıingi balalar qabyldanyp, jas erekshelikterine saı eki topqa bólinedi. Balalarǵa kompozısııa negizderin, beıneleý óneriniń túrli janry men tásilin, qolda bar materıaldardy paıdalanýdy úıretedi. Al «Aǵashqa órnek salý» kýrsy aǵashty óńdeý tásilderimen jáne erekshelikterimen tanystyrý, oıý-órnek túrlerin úıretý, býtaforlyq buıymdar jasaý sekildi baǵyttardy kózdeıdi.
Kıim úlgileýdi, pishý men tigýdi úırený de qyzyqty bolǵaly tur. Kýrs 10-nan 14 jasqa deıingi jasóspirimderge arnalǵan, munda olarǵa matamen jumys isteýdiń negizgi tásilderi men daǵdylaryn, kıimniń túrli bólikteriniń, onyń ishinde bas kıimniń tigisin keltirýdi oqytady. Álbette, barlyǵy teatrlyq kostıýmmen baılanystyrylyp jasalady.
– Stýdııa teatrǵa degen qyzyǵýshylyqty oıatý, balalardyń darynyn damytýǵa septesý jáne qol eńbegine baýlýdy ǵana maqsat etpeıdi, sonymen qatar oqýshylar arasynda teatrlyq qolónerdi nasıhattaýdy kózdeıdi. Bálkim, stýdııa tárbıelenýshileriniń arasynan bireý ózin ónermen baılanysty kásipte taýyp qalar. Stýdııa qyzmetindegi mańyzdy jetistik, mine, osy bolmaq, – deıdi teatr basshysy.