Rýslan Ysqaqov Qazaqstannyń Damý bankin basqarady, dep habarlaıdy Egemen.kz «Báıterek» ulttyq holdınginiń baspasóz qyzmetine silteme jasap.
«Báıterek» ulttyq basqarýshy holdıngi» AQ aksıoneriniń sheshimi boıynsha Rýslan Vıktorovıch Ysqaqov 16 aqpannan bastap «Qazaqstannyń Damý banki» AQ (QDB) basqarma tóraǵasy jáne dırektorlar keńesiniń múshesi bolyp saılandy. Ol buǵan deıin holdıngtiń enshiles uıymy – «KazakhExport» eksporttyq saqtandyrý kompanııasy» AQ-ny basqardy», delingen habarlamada.
«Báıterek» holdınginiń basqarma tóraǵasy Qanat Sharlapaev ujymǵa QDB-nyń jańa basshysyn tanystyrdy.
«Rýslan Vıktorovıchtiń qarjy uıymdarynda 18 jyldan asa jumys tájirıbesi bar, alty jyl boıy KazakhExport-ty basqardy jáne búginnen bastap Qazaqstannyń Damý bankiniń basshysy bolyp taǵaıyndaldy. Is-árekettegi merıtokratııa qaǵıdaty týraly aıtqym kelip otyr: bank naryǵynda jáne bizdiń holdıngte tabysty jumys istegen adam endi eń joǵary pozısııalardyń birine jetti. Ony qoldap, birge tabysty jumys isteısizder dep senemin», dedi Q.Sharlapaev QDB ujymyna arnaǵan sózinde.