Astanada Parlament Senaty men Ulttyq banktiń aqsha-kredıt saıasatyna arnalǵan kezekti birlesken bilim kýrsy bastaldy. Semınardyń ashylýynda tyńdaýshylarǵa Senat tóraǵasy Máýlen Áshimbaev pen Ulttyq bank tóraǵasy Tımýr Súleımenov dáris oqydy. Is-sharada jahandyq jáne ishki ekonomıkalyq úrdister men reformalarǵa, sondaı-aq el makroekonomıkasyn jańǵyrtýǵa baǵyttalǵan zańnamalyq mindetterge mán berildi.
Bıyl bilim kýrsyna qatysýshylar sany 80 adamǵa deıin artty. Bul Senattyń «Taldau» mektebi men Sarapshylar klýby sııaqty jobalar aıasynda elimizdiń sarapshylar qaýymdastyǵynyń taldaý qabiletin shyńdaýǵa baǵyttalǵan júıeli jumystyń jalǵasy ekenin atap ótken jón. Ashyq formattaǵy tórt aptalyq praktıkýmǵa Senat janyndaǵy Sarapshylar klýbynyń músheleri men «Taldau» mektebiniń túlekterinen bólek, kásibı biliktiligin arttyryp, bilimin jetildirýge nıetti mamandar, onyń ishinde aqsha-kredıt saıasaty máselelerin turaqty jarııalap júrgen jýrnalıster de qatysyp jatyr.
M.Áshimbaev Qazaqstandaǵy bıznes pen áleýmettik salanyń turaqtylyǵyn aıqyndaıtyn aqsha-kredıt saıasatynyń tıimdiligi ishki jáne syrtqy faktorlardy keshendi túrde taldaýmen baılanysty ekenin atap ótti. El ishindegi makroekonomıkalyq kórsetkishtermen qatar, sarapshylar óz strategııalarynda qaqtyǵystar, saýda-logıstıkalyq baǵyttardyń ózgerýi, shıkizat jáne qarjy naryqtaryndaǵy qubylmalylyq sekildi syrtqy syn-qaterlerdi de nazarda ustaýy qajet. Osy turǵydan alǵanda, bilim modýli qatysýshylardyń makroekonomıkalyq úderisterdi tereń taldaý jáne naryqtaǵy ózgeristerge jaýap retinde bilikti sheshimder ázirleý daǵdylaryn damytýǵa baǵyttalǵan.
«Prezıdent Qasym-Jomart Toqaev makroekonomıkalyq turaqtylyq pen aqsha-kredıt saıasatynyń tıimdiligi máselelerine únemi basa mán berip keledi. Bul bilim kýrsy qatysýshylarǵa jekelegen kórsetkishterdi ǵana emes, ekonomıkalyq úderisterdiń tutas kórinisin kórýge múmkindik beredi. Inflıasııalyq táýekelderdiń qalaı qalyptasatynyn, paıyzdyq mólsherlemeler men valıýta baǵamyna qandaı faktorlardyń áser etetinin, bıýdjet saıasatynyń, nesıeleýdiń, ınvestısııalar men ekonomıkalyq ósimniń ózara baılanysyn túsinýge jol ashady. Bıyl baǵdarlama ekonomıkalyq taldaýda jasandy ıntellektini paıdalaný máselelerimen de tolyqtyryldy. Mundaı format sheshim qabyldaý negizderiniń qalaı qalyptasatynyn tereńirek túsinýge septigin tıgizedi», dedi M.Áshimbaev.
Sondaı-aq Senat tóraǵasy semınardy uıymdastyrǵan Ulttyq bank ujymyna jáne ýaqyt bólip, bilimimen erikti túrde bólisýge nıet tanytqan dáriskerlerge alǵys bildirdi.
Aldaǵy tórt apta ishinde qatysýshylar makroekonomıkanyń negizderin, onyń mańyzdy kórsetkishterin, ekonomıkalyq modelderdi, tólem balansyn, ınflıasııalyq targetteý tetikterin, aqsha-kredıt jáne fıskaldyq saıasattyń ózara baılanysyn jan-jaqty zerdeleıdi. Baǵdarlamanyń basty maqsaty – túrli saladaǵy sarapshylarǵa arnalǵan boljamdyq modeldeý kezeńi arqyly aqsha-kredıt saıasaty boıynsha sheshim qabyldaý úderisine tereńirek mán berý.
Jalpy, bıylǵy semınarǵa qatysýshylar sany byltyrǵydan eki ese kóp. Osy oraıda buǵan deıin Senat Prezıdent Ákimshiliginiń Kólik jáne logıstıka bólimimen birlesip, kólik-logıstıkalyq áleýetti damytýǵa arnalǵan oqytý kýrsyn uıymdastyrǵanyn aıta ketken abzal. Sonymen qatar Senat Big Data men jasandy ıntellektini taldamalyq jumysta qoldanýǵa arnalǵan birqatar semınar ótkizdi. Atalǵan is-sharalar Jasandy ıntellekt jáne sıfrlyq damý mınıstrliginiń, sondaı-aq basqa da múddeli taraptardyń qatysýymen uıymdastyryldy. Bul bastamalar sarapshylar men salalyq mamandardyń taldaý qabiletterin shyńdap, bilimin jetildirýdi kózdeıdi.