Temirtaý qalasyndaǵy tarıhı-ólketaný mýzeıinde Qazaqstan Sýretshiler odaǵynyń múshesi, grafık-sýretshi Vıktor Polıkarpovtyń «Ana dala» atty jeke kórmesine kelýshilerdiń qarasy kóp.
Búginde Qazaqstan Sýretshiler odaǵynyń Pavlodar bólimshesin basqaratyn qylqalam sheberiniń bul kórmesi Táýelsiz Memleketter Dostastyǵynyń halyq shyǵarmashylyǵy jáne mádenı murasy jylyna oraı uıymdastyrylǵan.
Kórmege stanok grafıkasy jáne keskindeme baǵytynda eńbek etetin sheberdiń 16 týyndysy qoıylǵan. Uly dala tósindegi tylsym da tanys tirlik jaıynan syr shertetin bul týyndylardyń barlyǵy HH ǵasyrdyń basynda dúnıege kelgen jáne Qazaqstanda ómir súrgen aqyn Pavel Vasılevtiń poezııasyna arnalǵan ofort serııasynan turady.
Uzaq jyldar boıy únemi sony taqyryptardyń qyr-syryn ashýmen aınalysyp kele jatqan sýretshi kórmedegi kartınalardyń 1987 jyldan bergi ýaqyt aralyǵynda salynǵanyn aıtady.
Qazaqstannyń eńbek sińirgen qaıratkeri Vıktor Polıkarpov 1971 jyly N.Gogol atyndaǵy Almaty kórkemsýret ýchılıshesin bitirgen. Keskindeme ónerinde qaıtalanbas qoltańbasy bar sheberdiń Kórkemsýret akademııasynyń akademıgi degen ataǵy bar. Sýretshi Qurmet belgisi ordenimen marapattalǵan. Sonymen qatar ol 2010 jyly aqyn Pavel Vasılev atyndaǵy respýblıkalyq syılyqtyń laýreaty atanǵan.
Qaraǵandy oblysy,
Temirtaý qalasy