QR Premer-Mınıstri Álıhan Smaıylov Prezıdenttiń keńesshisi Sýma Chakrabartımen jáne BAÁ-niń Qazaqstan Respýblıkasyndaǵy tótenshe jáne ókiletti elshisi Muhammed Saıd Muhammed ál-Arıkımen kezdesti, dep habarlaıdy Egemen.kz.
Bul týraly Úkimettiń resmı saıty málim etti.
S. Chakrabartımen QR Úkimetiniń 2022 jylǵa arnalǵan is-qımyl baǵdarlamasyn talqylaı otyryp, usynylǵan reformalar Qazaqstannyń jańa ekonomıkalyq saıasatynyń negizi bolyp tabylatyny aıtyldy.
Ázirlengen sharalar kesheni jol kartasynyń 3 negizgi baǵyty — ekonomıkalyq reformalardyń strategııasy men baǵdarlamalaryn jetildirý, memlekettik basqarý, kommýnıkasııa jáne brend boıynsha iske asyrylatyn bolady. Sonymen qatar aýmaqtyq-keńistiktik damýdyń úsh qaǵıdatyn qamtıtyn, 2025 jylǵa deıingi aýmaqtyq damý josparyn ázirleý taqyryby qozǵaldy.
«Kásipkerlik sýbektilerin memlekettik qoldaý sharalarymen qamtýdy arttyrý úshin óńirlik damý baǵdarlamalary engiziletin bolady. Úkimet óńdeý ónerkásibiniń eksportqa baǵdarlanǵan jáne ımportty almastyratyn jobalaryn qarjylandyrýdyń tıimdi tetigin ázirleıdi», dep atap ótti Álıhan Smaıylov.
BAÁ-niń QR-daǵy tótenshe jáne ókiletti elshisi Muhammed Saıd Muhammed ál-Arıkımen kezdesýde ekijaqty kelisimderdiń iske asyrylý barysy jáne ınvestısııalar tartý máselesi talqylandy. 2021 jyly elder arasyndaǵy taýar aınalymy $709 mln qurady. 2020 jyldyń qorytyndysy boıynsha ózara saýda kólemi $474,4 mln boldy.
«Biz Qazaqstan ekonomıkasyna ınvestısııalardy ulǵaıtý arqyly BAÁ-men ózara is-qımyldy ári qaraı jandandyrýdy kózdep otyrmyz. Biz úshin «Astana» halyqaralyq qarjy ortalyǵynyń ámirliktiń iri qarjy ınstıtýttarymen, onyń ishinde «Abu Dhabi Global Market» qarjy ortalyǵymen belsendi ózara is-qımylyn jalǵastyrýy asa mańyzdy», dedi kelissóz kezinde Á. Smaıylov.
Qorytyndylaı kele, taraptar alda atqarylatyn jumystar týraly pikir almasyp, kún tártibindegi máselelerdi oryndaýdyń mańyzdylyǵyn atap kórsetti.