Bul týraly búgin О́ńirlik kommýnıkasııalar qyzmetinde ótken baspasóz máslıhatynda Almaty qalasy Áleýmettik medısınalyq saqtandyrý qory fılıalynyń dırektory Tileýhan Ábildaev málimdedi, dep jazady Egemen.kz.
Spıker tegin dári-dármekpen bıýdjet qarajaty esebinen TMKKK sheńberinde 35 nozologııa boıynsha dıspanserlik esepte turǵan pasıentter, sondaı-aq MÁMS paketinde 41 nozologııa boıynsha eresekter, 63 nozologııa boıynsha balalar qamtamasyz etiletinin habarlady.
Sonymen qatar, dári-dármektermen qan aınalymy júıesi, as qorytý organdary, qan óndirý organdary, endokrındik júıe aýrýlary, tamaqtaný jáne zat almasýdyń buzylýy, súıek-bulshyq et júıesi jáne júıke júıesi aýrýlary, psıhıkalyq aýytqýshylyq, keıbir ınfeksııalyq jáne parazıttik aýrýlar, isikter, tynys alý organdarynyń aýrýlary, nesep-jynys júıesi jáne t. b. aýrýlary bar pasıentter qamtamasyz etiledi.
Mysaly, 2021 jyly TMKKK jáne MÁMS sheńberinde pasıentterdi ambýlatorııalyq deńgeıde qamtamasyz etý úshin 24,8 mlrd teńge somasynda qarjylandyrý bólindi. TMKKK aıasynda – 219 myńnan astam pasıent, MÁMS paketi sheńberinde – 26 myńnan astam eresek pasıent, sondaı-aq 40 myńnan astam bala qamtamasyz etildi.
«2022 jylǵa 20 mlrd teńgeden astam somaǵa dári-dármek satyp alýǵa ótinimder kelisildi. Olar boıynsha jetkizý qańtardyń ortasynan bastap bekitilgen keste boıynsha bastaldy», dep atap ótti T. Ábildaev.
Qajet bolǵan jaǵdaıda pasıentter 1439 qysqa nómiri boıynsha tegin dári-dármekpen qamtamasyz etý máseleleri boıynsha SK-Farmasııanyń baılanys ortalyǵyna habarlasa alady, qalalyq jáne uıaly telefondar úshin qoljetimdi. Barlyq qońyraýlar tegin.
Baılanys ortalyǵynyń operatorlary júgingen pasıentterge tegin ári qajetti dári-dármekterdi jetkizý merzimderi men kúnderi týraly aqparat beredi.