Nur-Sultanda tennısten qysqy Qazaqstan chempıonaty óz máresine jetti. Bul jarysta elimizdiń birqatar myqty oıynshysy baq synady.
Áıelder arasyndaǵy básekeniń bas júldesin Jibek Qulambaeva men Gozal Aınıtdınova ózara sarapqa saldy. Jibek birinshi setti esh qınalmaı-aq óz paıdasyna sheshse, ekinshisin Gozal óte sátti bastap, 3:0 esebimen alǵa shyqty. Biraq bul jaǵdaı Qulambaevanyń eńsesin túsire almady. Qalǵan ýaqytta shıraq qımyldaǵan ol tarazy basyn teńestirdi. Esep – 6:3, 7:5. Qola júlde Arýjan Saǵandyqovaǵa buıyrdy. Sheshýishi tusta ol Ekaterına Dmıtrıchenkony eńserdi – 6:4, 7:6, Erler saısynda tájirıbeli Denıs Evseev pen jas daryn Beıbit Juqaev kúsh synasty. Ekeýara tartysta Beıbittiń baǵy jandy – 7:6, 6:2. Bul – 21 jastaǵy Mańǵystaý oblysy túleginiń sporttyq mansabyndaǵy ázirge eń iri tabysy. Úshinshi oryndy Dmıtrıı Lomakın ıelendi.
Erler men áıelder arasynda ótken juptyq saıystarda Jibek Qulambaeva men Ekaterına Dmıtrıchenko jáne Denıs Evseev pen Grıgorıı Lomakınǵa teń keler eshkim tabylmady.