«Shopan ata» Ulttyq mal ósirýshiler qaýymdastyǵy atyraýlyq sharýalar oblys ákimi Mahambet Dosmuhambetovtiń jumysyna rıza emestigin habarlady, dep jazady Egemen.kz.
«Shopan ata» Ulttyq mal ósirýshiler qaýymdastyǵy uıymdastyrǵan Atyraý sharýalarynyń óńirlik quryltaıyna kelgen sharýalardyń deni sý máselesin kóterdi. Onyń ishinde TES kanalynyń sýyn paıdalaný jaıy quryltaı barysynda birneshe márte sóz boldy.
– TES kanalynyń tóńiregindegi 13 sharýashylyqtyń muń-muqtajyn jetkizý úshin keldim. Bul máseleni sońǵy ret úsh aı buryn kótergenbiz. Jalpy, jyl saıyn aıtylatyn másele ǵoı. Sodan beri eshteńe sheshilgen joq. Kanaldyń sýy tartylyp, tórt túlik mal shalshyq sýdy iship otyr. Saldarynan baýyrqurt degen aýrý taraıdy. Malymyzdy kóbeıtemiz desek, kerisinshe qurttap óletin boldy. Kanalǵa eki mezgil sý jiberemiz dep edi. Biraq másele sheshiler emes. Jalpy, bul tóńirekke mal ustaýdyń qajeti bar ma, joq pa, sony bilgimiz keledi. Kanalǵa qatysty másele naqty sheshile me, joq pa? – dedi Qaıyrshaqty aýyldyq okrýginiń Serik esimdi turǵyny.
M.Dosmuhambetovtiń aıtýynsha, bul kúrdeli másele. Sondyqtan kanaldyń sýyn tolyqtyrýdyń joldaryn qarastyrý kerek deıdi.
– TES kanalynyń tóńireginde mal jaıyp otyrǵan sharýashylyqtardyń jaıyn jeke qarastyrý kerek. Sharýalar mal basyn arttyrǵysy keledi. Al sýdyń deńgeıi tómen túsip ketse, mal basyn kóbeıtý múmkin emes. Sol sebepti máseleni pysyqtaý qajet, – dedi oblys ákimi.
Alaıda jergilikti turǵyn Qaıyrshaqty aýyldyq okrýgi ákiminiń eseptik kezdesýinde TES-tiń mamandarymen jolyqqanyn aıtty. Olar Jaıyq-Kaspıı basseındik ınspeksııasymen birlesip kanalǵa sý jiberýge bolatynyn aıtqan.
Mahambet Dosmuhambetov quryltaıǵa qatysqan aýdan ákimderi men basqarma basshylaryna berilgen tapsyrmalardyń ýaqytyly oryndalýy kerek ekenin eske saldy.