Kenjelep qalǵan qysqy sport

Nysanaǵa jetý úshin nysan kerek

«Memlekettiń qarjysy jelge ushty», «Sportqa jaýapty basshylar jumysynan qýylsyn» degen mándegi áńgime tyıylmaı tur. Ol túsinikti de. Aqshaqar jasap kórmegen jurttyń balalary medal alyp, mereıi asyp-tasyp jatqanda yzalanbaı qaıtsin otandyq jankúıerler. Jańa Zelandııa, Aýstralııa sııaqty memlekettermen salystyrǵanda qarǵa kómilip jatqan eldiń ulandary emes pe edik?!

Pavlodar oblysy – qysty erte qarsy alyp, kóktemdi kesh shyǵaryp salatyn óńirlerdiń biri. Klımattyq jaǵdaıdy eskersek, hokkeı, konkı tebý jáne shańǵy sportynan respýblıkada aldyńǵy qatardan tabylýymyz mindetti de. Ázirge ondaı baqyt buıyrmaı tur. «Qolda barda altynnyń qadiri joqtyń» sıqy. Altyn demekshi, pavlodarlyq sportshylar Qysqy Olımpıadadan áli altyn alyp kórmepti. Jalǵyz júlde janǵa medeý. 1998 jyly Nagano qalasynda ótken Qysqy Olımpııa oıyndarynyń qola júldegeri, jerlesimiz Lıýdmıla Prokashevanyń jeńisti joly toqtap qalǵany ókinishti-aq.

Konkıshi arý búginde bapkerlik qyz­­­mette. Pavlodar óńirinde qysqy sport­­­tyń aqsap turǵanyn jasyrmaıdy. Áıt­pese, baıaǵyda-aq Aq Olımpıadanyń júl­degerlerin top-tobymen túlep ushy­rýǵa bolar edi, deıdi ol.

– Elimizde konkı sportymen aına­lysýǵa yńǵaıly eki jabyq stadıon bar. Biri – Nur-Sultan qalasynda ornalasqan, endi biri – «Medeý». Muzaıdyndar Qostanaı, Rýdnyı jáne Semeı qalalarynda ǵana bar. Pavlodar bylaı tursyn, sońǵy kezde konkı sporty qarqyndy damyp kele jatqan О́skemen, Aqtóbe jáne Petro­pavl óńirlerinde atymen joq. Sport­tyq ınfraqurylym máselesin sheshpeı, júldeden dámelený bos áńgime. Pavlodar oblysynda konkı sportynyń damýyna kóp kóńil bólinedi dep aıta almaspyn. Sportshylarǵa arnaıy ǵımarat qarastyrylmaǵan. Osynyń saldarynan árkimniń qabaǵyna qarap, tipti Nur-Sultan qalasyna baryp jattyǵýǵa májbúrmiz. Konkıshilerge eshqandaı jaǵdaı jasalmasa da, úzdik nátıjege qol jetkizip keledi. «Chempıondar qashan shyǵady?» degen saýaldy qoımastan buryn sporttyq ınfraqurylym máselesin qolǵa alǵan jón, – deıdi L.Prokasheva.

Bul pikirmen kelispeýge bolmas. Sport­shylarǵa jaǵdaı jasamaı, nátıje talap etý durys emes-aý. Kez kelgen sport túri bolsyn, eń áýeli jattyǵý alańdarymen qamtamasyz etilýge tıis emes pe? Osy rette oblystyq týrızmdi jáne sportty damytý jónindegi basqarmanyń bólim basshysy Aınur Qospaqovamen habarlastyq.

– Aımaǵymyzda qysqy sport túrle­rinen konkı, shańǵy tebý, bıatlon, mánerlep syrǵanaý, frıstaıl-akrobatıka, shaıbaly hokkeıdiń bási bıik. Short-trek sportyna da qyzyǵýshylyq arta bastady. Shamamen 8200-den astam adam qysqy sportpen turaqty aınalysyp júr. Balalar-jasóspirimder sport mektebinde 1 422 adam jattyǵyp, kásibı túrde sheberlikterin shyńdaýda. Ulttyq qurama sapynda 17 pavlodarlyq bar. Jýyqta aıaqtalǵan Beıjiń Olımpıadasynda jerlesterimiz Irına Bykova (shańǵy sporty), Denıs Nıkısha, Olga Tıhonova (ekeýi de short-trek) óner kórsetti. Halyqaralyq jarys­tarda el namysyn abyroımen qorǵaıtyn jerlesterimizdiń qatary artady dep úmit­tenemiz. Sebebi sońǵy jyldary sporttyq ınfraqurylym, balalar sportyn damytý isine kóp kóńil bóline bastady, – deıdi A.Qospaqova.

Qysqy sporttyq nysandar jyl saıy­n salynyp jatyr dep aıta almaspyz. Byltyr «Sport sıtı» jobasy sheńberinde oblys ortalyǵynda jańa muz-syrǵanaý arenasy paıda boldy. Oǵan deıin jer-jerde shaǵyn fýtbol alańdarynyń salynyp kelgeni ǵana esimizde qalypty. Sport salasyna jaýapty mamandardyń sózderine sensek, aldaǵy ýaqytta Baıanaýyl aýdanynda shańǵy roller tas joly salynbaq. Jobalyq-smetalyq qujaty ázir tur. Tek bıýd­jetten qarajat bólinýi kerek. Son­daı-aq Ekibastuz qalasyn áleýmettik-ekono­mıkalyq damytýdyń 2021-2025 jyldarǵa arnalǵan keshendi josparyna sáıkes jańa muz saraıyn salý kózdelýde. Joba­nyń boljamdy quny – 2 500 mln teńge.

Jalpy, aımaǵymyzda jo­ǵary sporttyq sheberlik mek­te­­biniń ıeligindegi jabyq muz ke­sheni (burynǵy «Astana» muz saraıy), 3 shańǵy bazasy,

70 hokkeı korty (onyń 9-y jabyq túrdegi) bar eken. Soltústik óńir úshin kóp emes, árıne. Áıteýir, jyl saıyn tozǵanyn jamap, eskisin jańartyp álekpiz.

Joǵary sporttyq sheberlik mektebiniń dırektory Qaırat Qaıyrbaevtyń aıtýynsha, aldyńǵy jyly «Jumyspen qamtýdyń jol kartasy – 2020» baǵdarlamasy sheń­be­rinde muz kesheniniń shatyry jańar­tylǵan.

– Shatyrdyń aýystyrylmaǵanyna 10 jyldan asa ýaqyt ótken edi. Sonyń saldarynan tóbeden sý aǵyp, ákimshilik korpýs, fıtnes-zal, kort sııaqty ǵımarattyń negizgi bólikteri jıi búlinetin-di. Jobaǵa sáıkes ǵımarattyń jertólesi de retke kel­tirilip, jalpy uzyndyǵy 230 metrdi quraıtyn qubyrlar jańartyldy. Nysan­nyń ishki bóligi túrli túske boıalyp, ajary kelise túskenin atap ótken jón, – deıdi Q.Qaıyrbaev.

Muz saraıyndaǵy jańashyldyqtardyń biri – zamanaýı tablo. Endigi jerde jazbalar tek ekranda ǵana emes, túrli-tústi árippen muz aıdynynda da jarq etýde. Muny teledıdardan Qurlyqtyq hokkeı lıgasynyń oıyndaryn tamashalap júrgen kózi qaraqty jankúıerler jaqsy biledi. Tablonyń kólemi de úlken. Osylaısha, kórermender soǵyl­ǵan shaıbanyń qaıtalaýyn, ózge de aq­parat­tardy jaqynnan kóre alady. Muzaı­dyndy jaryqtandyrý isi de qolǵa alynǵan. Jarty bóligine jańa shamdar ornatylyp, kezdesýlerdi tikeleı efırde translıasııalaýǵa jol ashylmaq. Sondaı-aq shamdar syǵyraımaýy úshin elektr jelisin jańǵyrtý jumystary júrgizilgen.

– Ázirge tehnıkalyq máseleler retke keltirilýde. Aldaǵy ýaqytta ǵımarattyń qasbetin jańartý qolǵa alynady dep josparlanyp otyr. Baspaldaqtardy da granıtten ornatý oıda bar. Bastysy – jankúıerlerge yńǵaıly jaǵdaı jasaý. Kórermender zaldyń sýyq ekenin jıi aıtady. Ol úshin ylǵaldy aýany keptirgish júıeni aýystyrý qajet. Oǵan shamamen 20 mıllıon teńge qarajat qajet, – deıdi Qaırat Qaıyrbaev.

Basymdyq – balalar sportyna!

Oblystyq týrızmdi jáne sportty damytý jónindegi basqarmanyń bólim basshysy Oleg Kolevtiń aıtýynsha, shaıbaly hokkeımen aınalysý qansha jerden qymbat desek te, jyl saıyn kóptegen bala hokkeı úıirmelerine qatysýǵa nıet bildiredi eken.

– Balasyn shaıbaly hokkeı úıirmesine bergen ata-analarǵa salmaq túsetini ras. Sebebi qajetti kıimder men quraldardyń baǵasyn eseptegende 200-250 myń teń­geden asyp jyǵylady. Biz jyl saıyn bıýdjetti naqtylaǵan ýaqytta balalar-jasóspirimder mektebindegi hokkeı toptaryna forma satyp alý kerek ekenin jıi kórsetemiz. Biraq usynysymyz árdaıym qoldaý taba bermeıdi. Sol sebepti, kóbine ata-analar qajetti zattardy ózderi satyp alady. Jalpy, Pavlodarda hokkeı sportyn súıetinder kóp. Oblys ortalyǵynan bólek, Ekibastuz, Aqsý qalalarynda, Tereń­kól aýdanynda áýesqoı hokkeı komandalary bar, – deıdi ol.

Balalar sportyna toqtalýymyz beker emes. Memleket basshysy Qasym-Jomart Toqaev óz Joldaýynda buqaralyq jáne balalar sportyn damytýǵa basymdyq berý kerek ekenin shegelep aıtqan bolatyn. Bul rette shaıbaly hokkeıden el chempıonatynda baq synap júrgen Ertis komandasynyń bıýdjeti qysqarǵanyn atap ótken jón. Qarjynyń qaıda baǵyt­talǵanyn túsinip otyrǵan bolarsyz. Qar­jylyq qıyndyqtarǵa baılanysty kóptegen oıynshy pavlodarlyq ujymmen qosh aıtysty. Qomaqty jalaqy alyp kelgen lıgonerler ózge baı komandalardyń esigin syǵalap ketti. Qýantarlyǵy, keıbir pavlodarlyq oıynshylar jalaqy mólsheri mańyzdy emes ekenin aıtyp, týǵan qala­synyń namysyn qorǵaýǵa kelisti. Jergilikti jas oıynshylarǵa senim artqan pavlodarlyq ujymnyń jaǵdaıy osy.

Qoryta aıtsaq, balalar sportyn damytpaı, sporttyq ınfraqurylymdy jandandyrmaı jetistikke jetý qıyn. Beıjiń Olımpıadasynan keıingi ókpe basylar. Tórt jyldan keıin Italııa jerinde (Mılan jáne Kortına-d’Ampesso shaharlarynda) ótetin Aq Olımpıadaǵa daıyndyqty búginnen bas­taý kerek. Álemge tanymal opera ánshisi pavlodarlyq Marııa Mýdrıak baǵyndyrǵan Mılan shahary pavlodarlyq sportshylarǵa, otandyq oǵlandarǵa juǵysty bolsyn!

Pavlodar oblysy