Bolgarııanyń bas shahary – Sofııada ótip jatqan bokstan «Strandja kýbogynyń» irikteý básekeleri aıaqtalyp, shırek fınal jekpe-jekteri bastaldy. Úshinshi jarys kúniniń qorytyndysy boıynsha eki jerlesimiz halyqaralyq týrnırdiń jartylaı fınalyna joldama aldy. Demek, ázirge Qazaqstan quramasynyń qorjynynda kem degende eki qola medal bar.
Jyldyń alǵashqy iri týrnırine qatysyp jatqan jerlesterimiz Bolgarııada jaqsy nátıje kórsetýde. Ázirge qazaqstandyq boksshylardan birinshi bolyp halyqaralyq týrnırdiń jartylaı fınalynda byltyrǵy el birinshiliginiń kúmis júldegeri, áskerıler arasyndaǵy álem chempıonatynyń jeńimpazy Abzal Quttybekov (92 kg) shyqty. Aýyr salmaqta óner kórsetetin otandasymyz shırek fınalda qazaqstandyq boks jankúıerlerine jaqsy tanys ıspanııalyq Emmanýel Reıespen judyryqtasty.
Esterińizde bolsa, ol byltyrǵy Tokıo Olımpıadasynda Vasılıı Levıtti ekinshi raýndta nokaýtpen jeńgen edi. Serbııadaǵy álem birinshiliginde qola júlde alǵan Reıestiń shamasy bul joly Abzal Quttybekovke jetpedi. Otandasymyz birinshi raýndta 5:0 esebimen aıqyn basymdyq tanytsa, ekinshi raýndta Emmanýel ústem boldy – 3:2. Sońǵy sheshýshi raýndty Abzal óz paıdasyna aıaqtap (3:2), Levıttiń esesin qaıtaryp qana qoımaı, jarystyń jartylaı fınalyna ótti.
Jerlesimiz fınalǵa joldama beretin básekede О́zbekstan quramasy sapynda baq synaıtyn qandasymyz Madııar Saıdrahımovpen judyryqtasatyn boldy. 2020 jyly О́zbekstan chempıonatynda top jarǵan Madııar shırek fınalda ýkraınalyq Robert Martonnan basym tústi. Aıta keteıik, M.Saıdrahımov Serbııadaǵy álem chempıonatynda qazaqstandyq Aıbek Oralbaıdy jeńip, jahandyq dodanyń qola júldegeri atanǵan edi.
Madııardan bólek, osy týrnırde Reseıdiń qyzdar quramasynda da otandasymyz baq synaýda. Ol – Reseıdiń Omby qalasynyń týmasy Saltanat Medenova. Saltanat Serikqyzy – Reseı chempıony jáne Álem kýbogynyń ıegeri. Sonymen qatar Saltanat jastar arasynda Eýropa chempıonatynyń qola júldesin jeńip alǵan.
Enshimizdegi ekinshi jartylaı fınaldyń joldamasy qyzdar arasynda aýyr salmaqta synǵa túsetin Lázzat Kúngeıbaevaǵa (81 kılodan joǵary) tıesili. Bir qyzyǵy, jerlesimiz jerebe nátıjesi boıynsha birde-bir jekpe-jek ótkizbeı, jartylaı fınalda óner kórsetýge múmkindik aldy.
Sondaı-aq Qazaqstan erler quramasy sapynan Sanjar Táshkenbaı, Danııal Sabıt (48 kg), Damır Ábdiqadyr, Tımýr Qabdeshov (51 kg), Mahmud Sabyrhan (54 kg), Beıbarys Jeksen, Orazbek Asylqulov (57 kg), Vasılıı Samchýk (60 kg), Abzal Serik (63,5 kg), Dýlat Bekbaýov (67 kg), Erasyl Jaqpekov (80 kg), Saǵyndyq Toǵambaı (86 kg) jáne Nurlan Saparbaı (92 kılodan joǵary) jartylaı fınalǵa shyǵýǵa talpynyp kóredi.
Al qyzdar quramasynan Alýa Balqybekova (48 kg), Nazym Qyzaıbaı (50 kg), Balaýsa Muzdyman, Dına Jolaman (54 kg), Karına Ibragımova (57 kg), Valentına Halzova (70 kg), Nadejda Rıabes (75 kg), Anastasııa Baıazıtova (81 kg) jáne Valerııa Aksenova (81 kılodan joǵary) shırek fınalda judyryqtasady.