23 aqpanda Mırzo-Ulyqbek aýdandyq qylmystyq ister jónindegi sotynda sot 1999 jyly birinshi prezıdent Islam Karımovqa qastandyq jasaýǵa qatysqan 53 jastaǵy er adamǵa qatysty úkim shyǵardy, dep habarlaıdy Egemen.kz.
Tashkent qalalyq sotynyń baspasóz qyzmetiniń habarlaýynsha, úkim boıynsha er adam 155 (terrorızm), 159 (О́zbekstan Respýblıkasynyń konstıtýsııasyna nuqsan keltirý), 161 (dıversııa), 164 (tonaý) baptary boıynsha kináli dep tanyldy.
223 (О́zbekstan Respýblıkasynyń shekarasyna zańsyz shyǵý nemese О́zbekstan Respýblıkasyna zańsyz kirý), 242 (qylmystyq qoǵamdastyq uıymdastyrý) jáne 244-2-bap (dinı-ekstremıstik, separatıstik, fýndamentalıstik nemese ózge de tyıym salynǵan uıymdar qurý, olarǵa basshylyq etý, olarǵa qatysý) boıynsha kinási dáleldenip. Qylmystyq kodekstiń 1-babyna sáıkes ómir boıyna bas bostandyǵynan aıyryldy.
Eske sala ketsek, 1999 jyly 16 aqpanda Tashkentte birqatar lańkestik áreket uıymdastyrylyp, saldarynan 13 adam qaza tapqan. Júzden astam adam jaralanǵan bolatyn.
Buǵan deıin Memlekettik qaýipsizdik qyzmetiniń baspasóz qyzmeti 2022 jyldyń qyrkúıeginde 23 jyl buryn izdeý jarııalanǵan «Túrkistan ıslam qozǵalysy» halyqaralyq lańkestik uıymynyń múshesi shetelde ustalyp, Tashkentke jetkizilgenin habarlaǵan.
Ol 1969 jyly Tashkent oblysynda dúnıege kelgen. 1998 jyldyń basynda Sheshenstanǵa baryp, ıordanııalyq lańkes Hattab qurǵan sodyrlar lagerinde arnaıy daıyndyqtan ótip, keıin Aýǵanstandaǵy halyqaralyq lańkestik uıymǵa qosylǵan. 1999 jyly qańtarda Túrkistan ıslam qozǵalysy jetekshileriniń buıryǵymen Tashkentke kelip, aýqatty azamattardyń úılerine shabýyl jasap, urlanǵan aqsha men baǵaly zattardy Aýǵanstanǵa tasymaldaýmen shuǵyldanǵan.
Ustalǵan azamat 1999 jyly 16 aqpan men 30 naýryzda Tashkentte bolǵan lańkestik áreketterge de qatysqan. Odan keıin 1999-2006 jyldar aralyǵynda shet memleketterde halyqaralyq lańkestik uıymdardyń qatarynda soǵysqan.