QR Bas prokýratýranyń Qylmystyq qýdalaý qyzmeti bastyǵynyń orynbasary Eldos Qılymjanov qańtar oqıǵasyna qatysty tergeý jumystarynyń barysy týraly baıandady, dep habarlaıdy Egemen.kz.
«Jedel-tergeý toptarynyń óndirisinde sotqa deıingi 3 666 tergep-tekserý isi bar. Terrorızm aktileri men jappaı tártipsizdikter týraly isterden basqa, tonaý, urlyq, qarýdy urlaý, quqyq qorǵaý organdarynyń qyzmetkerlerine kúsh qoldaný faktileri tergelýde. Atalǵan sanattan 162 aıyptalýshyǵa qatysty 101 qylmystyq is sotqa joldandy. 62 adam sottaldy», dedi E.Qılymjanov Ortalyq kommýnıkasııalar qyzmetinde ótken brıfıng barysynda.
Jappaı tártipsizdik kezinde 4 myńnan astam adam túrli dene jaraqattaryn alǵan. Olardyń ishinde 2402 polısııa qyzmetkerleri, 990 qoǵamdyq tártipti qamtamasyz etýge tartylǵan áskerı qyzmetshiler bar.
«Quqyq qorǵaý organdary qylmysqa qatysqandardy anyqtaý jáne jaýapqa tartý boıynsha barlyq qajetti sharalardy atqarýda. Aqtóbe qalasynda uıaly telefon beınejazbasynyń arqasynda I. esimdi azamattyń 5 qańtarda VAZ-21014 avtokóligin basqaryp, oblys ákimdigi aldynda polıseılerdi úlken jyldamdyqpen soqqany anyqtaldy. Nátıjesinde 4 polıseı dene jaraqattarymen aýrýhanaǵa jatqyzyldy. Polısııa qyzmetkerleriniń ómirine qolsuǵýshylyq áreketi úshin bul turǵyn sot sanksııasymen qamaýǵa alyndy. Sonymen qatar T. jáne I. esimdi turǵyndar dýbınkalardy paıdalanyp, Almaty qalasy ákimdiginiń aldynda polısııa qyzmetkerin qatty soqqyǵa jyqqan. Atalǵan adamdar qamaýda otyr», dedi Eldos Qılymjanov.