Bas prokýratýranyń 1-qyzmet bastyǵynyń orynbasary Eldos Qılymjanov pen IIM Tergeý departamentiniń bastyǵy Sanjar Ádilov «Qasiretti qańtar» oqıǵalaryn tergeý barysy týraly resmı málimdeme jasaýdy jalǵastyrýda.
Ortalyq kommýnıkasııalar qyzmeti alańynda ótken brıfıngte E.Qılymjanov qazirgi tańda jedel tergeý toptarynyń óndirisinde 3 666 sotqa deıingi tergep-tekserý isi bar ekenin málimdedi. Onyń ishinde terrorızm aktileri men jappaı tártipsizdikter týraly isterden bólek, tonaý, urlyq, qarý urlaý, quqyq qorǵaý organdary qyzmetkerlerine kúsh qoldaný faktileri de tergelýde. Bas prokýratýra ókiliniń málimdeýinshe, 162 aıyptalýshyǵa qatysty 101 qylmystyq is sotqa joldansa, 62 adam sottalǵan. Sotty bolǵandardyń ishinde Almaty qalasyndaǵy «Alpamys» ańshylyq dúkeninen qarýlardy urlaǵany úshin kináli dep tanylǵan eki azamat ta bar. Almaly aýdandyq sotynyń úkimimen B.Ontaı pen О́.Jeńishan 5 jylǵa bas bostandyqtarynan aıyryldy. «Tergeý barysynda 5 qańtarda Aqtóbe qalasynda «VAZ 21014» markili kóliginde otyrǵan jigittiń oblys ákimdiginiń aldynda turǵan polıseılerdiń qorshaýyn úlken jyldamdyqpen kelip soqqany anyqtaldy. Bul kórinis uıaly telefonǵa jazylyp qalǵan. Aýyr soqqydan 4 polısııa qyzmetkeri dene jaraqattarymen aýrýhanaǵa jatqyzyldy. Keıinnen tártip saqshylarynyń ómirine qaýip tóndirgen kúdikti sot sanksııasymen qamaýǵa alyndy. Sondaı-aq Almatyda qala ákimdiginiń aldynda polısııa qyzmetkerlerin aıaýsyz soqqynyń astyna alǵan eki kúdikti de qamaýda otyr», deıdi E.Qılymjanov.
Esterińizde bolsa, qańtar oqıǵasy kezinde 4 myńnan astam adam jaraqattanǵan bolatyn. Onyń 2 402-si polısııa qyzmetkeri bolsa, 990-y áskerı qyzmetshi.
Bas prokýratýra ókili qańtar oqıǵasyna qatysty BAQ pen áleýmettik jelilerdegi jarııalanymdarǵa monıtorıng júrgizý, qamaýda otyrǵan adamdardy ustaý jaǵdaılaryna tekserý is-sharalarynyń jalǵasatynyn da habarlady. Qazirgi ýaqytta tergeý ızolıatorlarynda 751 adam otyr. Al 199 kúdiktiniń bultartpaý sharasy eshqaıda ketpeý týraly qolhatqa, kepilge, úıqamaqqa alýǵa jáne jeke kepilgerlikke aýystyrylǵan. Sonymen qatar Adam quqyqtary jónindegi ýákil, Úılestirý keńesiniń músheleri jáne Ulttyq aldyn alý tetiginiń qatysýshylary tergeý, ýaqytsha ustaý ızolıatorlary men arnaıy qabyldaý oryndarynda 118 kezdesýge qatysqan.
Qańtar oqıǵalaryn tergeýdiń aldyn ala nátıjeleri týraly habarlaǵan Sanjar Ádilov tergeý óndirisindegi 2997 qylmystyq is boıynsha sot sanksııasymen 194 adam ustalǵanyn aıtty. Olardyń 152-si jappaı tártipsizdik barysynda urlyq jasaǵany, 22-si qarýdy zańsyz saqtaǵany jáne 24 adam qarýdy urlaǵany úshin qamaqqa alynǵan. Tergeýshiler 174 kúdiktige qatysty qylmystyq isterdi aıyptaý aktisimen aıaqtady. «Polısııa qyzmetkerleri jappaı tártipsizdikter kezinde urlyq jasap, tonaýǵa barǵandardy anyqtaý jumystaryn áli de jalǵastyryp keledi. Tek ótken apta ishinde múlikti jáne qarýdy urlaý faktileri boıynsha 7 kúdikti ustaldy. Olardyń arasynda Almatyda polısııa qyzmetkerleriniń arnaıy quraldaryn qoldy qylyp, 4 dúkendi tonap ketken 5 adamnan qurylǵan top bar», dep málimdedi S.Ádilov.
IIM-niń derekterine qaraǵanda, qańtar oqıǵasy kezinde 1502 bıznes obektisine shabýyl jasalǵan. Onyń ishinde 1360 saýda orny men dúken, 36 bank ofısi men kóshedegi bankomat, 31 qoǵamdyq tamaqtaný orny, 26 lombard, 21 janarmaı stansasy, 6 bazar, 4 valıýta aıyrbastaý pýnkti, 3 dárihana, 1 avtosalon men kásipkerliktiń basqa da nysandary bar. Polısııa organdary eń aldymen zardap shekken azamattar men bıznes ókilderine járdemdesip, keltirilgen zalaldyń ornyn toltyrý boıynsha sharalar qabyldap jatqanyn aıtqan S.Ádilov polısııa qyzmetkerleriniń quny 288 mln teńgeden asatyn urlanǵan múlikti anyqtaǵanyn málimdedi. Sondaı-aq urlanǵan myńnan astam qarý tárkilenip, 21759 oq-dári tabylǵan.