Orta salmaqtaǵy IBF jáne IBO chempıondyq belbeýiniń ıegeri qazaqstandyq Gennadıı Golovkın (41-1-1, 36 KO) men ekinshi orta salmaqtaǵy álemniń absolıýtti chempıony meksıkalyq Saýl «Kanelo» Alvares (57-1-2, 39 KO) arasyndaǵy úshinshi jekpe-jek kúzde ótedi.
Amerıkalyq USA Today Sports+ basylymynyń málimetinshe, trılogııa 17 qyrkúıekke josparlanǵan. Al jekpe-jek ekinshi orta salmaq dárejesinde (168 fýnt) ótedi. Bul kezdesýde Alvarestiń tórt belbeýi sarapqa salynady. Trılogııa boksshylardyń buǵan deıingi eki aıqasy ótken AQSh-tyń Las-Vegas qalasynda uıymdastyrylady dep josparlanýda. Bir aıta keterligi, eki boksshy arasyndaǵy alǵashqy aıqas 2017 jyldyń 16 qyrkúıeginde, ekinshisi 2018 jyldyń 15 qyrkúıeginde ótken edi.
Bul jekpe-jekke deıin Golovkın de, «Kanelo» da sáýir-mamyr aılarynda bir-bir kezdesýden ótkizedi. Otandasymyz sáýirde japonııalyq Rıota Mýratamen, Saýl Alvares 7 mamyrda reseılik Dmıtrıı Bıvolmen judyryqtasady.