Sársenbi kúni Premer-Mınıstr Kárim Másimov birqatar kezdesýler ótkizdi, dep habarlady Premer-Mınıstrdiń baspasóz qyzmeti.
Birikken Arab Ámirlikteriniń Memlekettik syrtqy ister mınıstri Anvar Gargashpen bolǵan kelissózder barysynda ekijaqty saýda-ekonomıkalyq jáne mádenı-gýmanıtarlyq qyzmettestikti odan ári arttyra túsý perspektıvalary talqylandy.
A.Gargash sondaı-aq Astanada ótip jatqan saýda-ekonomıkalyq qyzmettestik jónindegi Qazaqstan-BAÁ birlesken úkimetaralyq komıssııa-synyń 4-shi otyrysynyń kún tártibi týraly da habarlady.
Premer-Mınıstr K.Másimovtiń Úndistannyń Syrtqy ister mınıstri Somanahallı Mallaıah Krıshnamen kezdesýinde eki el arasyndaǵy ekonomıkalyq qyzmettestiktiń bolashaǵy áńgime arqaýyna aınaldy.
Taraptar Qazaqstan-Úndistan qyzmettestigin jańa deńgeıge shyǵarýǵa jaǵdaı jasaıtyn strategııalyq áriptestikti damytýǵa degen múddelikterin bildirdi.