Qasym-Jomart Toqaevqa Sybaılas jemqorlyqqa qarsy qyzmettiń bıylǵy atqarǵan jumysynyń nátıjeleri men qoǵamda rezonans týdyrǵan qylmystyq isterdiń tekserilý barysy týraly esep berildi, dep habarlaıdy Egemen.kz Aqordaǵa silteme jasap.
Oljas Bektenov usynǵan derekterge sáıkes 2 aıdyń ishinde 240 adamnyń, onyń ishinde respýblıkalyq jáne oblystyq deńgeıdegi 40 basshynyń sybaılas jemqorlyqqa qatysy bar ekeni áshkerelendi. Olardyń qatarynda 1 vıse-mınıstr, 1 qala ákimi jáne oblystyq basqarmalardyń 11 jetekshisi bar. Keltirilgen shyǵynnyń ornyn toltyrý úshin kúdiktilerdiń quny 5,4 mıllıard teńge bolatyn múlkine tyıym salyndy.
Kezdesýde Sybaılas jemqorlyqqa qarsy qyzmettiń «tazalyǵyn» qamtamasyz etý jónindegi tapsyrmalarynyń oryndalýy baıandaldy.
Memleket basshysyna Sybaılas jemqorlyqqa qarsy saıasat tujyrymdamasynyń iske asyrylýy týraly málimet berildi. Salalyq vedomstvo jetekshesiniń aıtýynsha, aqpan aıynda Parlament Májilisi negizsiz baıyǵany úshin jaýapkershilik týraly zań jobasyn birinshi oqylymda maquldady.
Osylaısha, kvazımemlekettik sektordaǵy komplaens qyzmetteriniń jumysyna, sybaılas jemqorlyq úshin basshylardyń derbes jaýapkershiligi ınstıtýtyn jetildirýge erekshe kóńil bólindi.
Budan bólek qazirgi ýaqytta «follow the money» qaǵıdaty boıynsha qarjylyq tergeýdi damytýǵa, para berý jóninde ýádelesýge jáne para usynýǵa qatysty qylmystyq jaýapkershilikti engizýge jáne sybaılas jemqorlyq úshin zańdy tulǵalardyń jaýapkershiligin kúsheıtýge baǵyttalǵan zańnamalyq sharalar toptamasy pysyqtalyp jatyr.
Kezdesý qorytyndysy boıynsha Qasym-Jomart Toqaev Oljas Bektenovke Sybaılas jemqorlyqqa qarsy saıasat tujyrymdamasyn tıimdi júzege asyrýǵa jáne sybaılas jemqorlyq úshin jaýapkershiliktiń bultartpastyǵyn qamtamasyz etýge baǵyttalǵan birqatar tapsyrma berdi.