Kóshede jeńil kólikpen arly-berli júıtkitip óte shyǵatyn qyz-kelinshekterge kóz úırengeli qashan. Al endi qoıý shańnyń arasynda qazba jumysy qyzyp jatatyn iri ken tabandarynda toqsan tonnalyq taýdaı tehnıkany tizgindep, rýda tasyp júrgen arýlardy kórgen jan bar ma eken? Kenishte, sonaý eńiste júrgen soń olar syrt kózge baıqala bermeıdi.
Jitiqaradaǵy «Komarov taý-ken kásipornynda» osydan bir jyl buryn jasaqtalǵan áıelder brıgadasynyń quramynda 91 tonnaǵa deıin júk kóteretin Komatsu-785 kóligin júrgizetin Ásel Tuıaqova, Nadejda Chýpahına, Ajar Jaqsybaeva, Álııa Esenova syndy arýlar shahtanyń tereń qoınaýynda qoparylǵan jynys qyrtystaryn jer ústine shyǵarady. Kenshi áıelder eki-ekiden, aýysym boıynsha bólinip jumys isteıdi. Ásel men Ajar tańerteńnen keshke deıin rýlde, al túnge qaraı olardy Álııa men Nadejda aýystyrady.
Turqyna qarasań, ońaılyqpen qozǵala qoımaıtyndaı bolyp kórinetin alyp mashınanyń tilin áıelderdiń qaı-qaısysy da jetik meńgerip alǵan. Tórt arý buǵan deıin de kólik júrgizgen. Nadejdanyń rýlge otyrǵanyna bıyl jıyrma jyldan asypty. Al Ajardyń 18 jyl júrgizýshilik ótili bar.
Qalaı desek te, kenish kóligin júrgizý asa jaýapty ári aýyr jumys.
– Sizderdi mundaı jumysqa úıdegi otaǵalaryńyz qalaı jiberip júr?, dep edik, júrgizýshi kelinshekter: – Joldastarymyz da osynda jumys isteıdi, biz qaıda baramyz?, dep kúle jaýap qatty. Áseldiń jubaıy ǵana bastapqyda zaıybynyń kenishte kólik júrgizýine qarsy bolypty, alaıda keıin jumsarǵan kórinedi. Al Nadejdanyń jubaıy «Komarov» kásipornynda «Gazel» kóligin júrgizedi. – Keıde ekeýmiz jol ústinde kezdesip qalamyz. Ondaı sátterde shap-shaǵyn kóligi kózime shyrpynyń qorabyndaı bolyp kórinse de, qorashsynbaı jeke basyn syılap, taýdaı máshınemdi shetke buryp jubaıyma jol beremin, – dep qýlana jymıyp qoıdy Komatsu júrgizýshisi.
Qostanaı oblysy