Almaty qalasynyń sottaryna qańtar oqıǵalaryna baılanysty 82 qylmystyq is kelip tústi. Bul týraly Almaty qalalyq sotynyń baspasóz qyzmeti habarlady, dep jazady Egemen.kz.
Qalalyq sot usynǵan málimetke qaraǵanda, 41 qylmystyq is boıynsha úkim shyǵaryldy, taǵy 41-i qaraý satysynda.
«Kelip túsken qylmystyq isterdiń negizgi bóligi QR QK 188 - baby 3-bóligi «Turǵyn úıge, qyzmettik nemese óndiristik úı-jaıǵa, qoımaǵa ne kólik quralyna zańsyz kirý arqyly urlyq jasaý» boıynsha qaralady», dep atap ótti Almaty qalalyq sotynyń baspasóz hatshysy Abaı Jarylqasyn.
Onyń aıtýynsha, eń kóp is Almaly jáne Áýezov qylmystyq sottaryna túsken. Ustalǵandar óz kinásin moıyndap, keltirilgen materıaldyq zalaldy óz erkimen óteıdi.
Sondaı-aq, sottar kámeletke tolmaǵan balalardyń nemese qart ata-analardyń asyraýyndaǵy kúdiktilerdiń bolýyn, olardyń keıbireýleriniń birinshi ret qylmys jasaǵanyn jáne jaǵymdy sıpattamalaryn eskerip, probasııalyq baqylaý ornata otyryp, úkim shyǵarady.
Kinálilerdiń kópshiligi 2-den 4 jylǵa deıin bas bostandyǵyn shekteýge, 100 saǵattyq májbúrli jumysqa sottaldy. Olardyń kópshiligi jastar men jumyssyzdar. Olar turmystyq tehnıkany, zattardy, alkogoldi ishimdikterdi, uıaly telefondardy, kompıýterlik tehnıkany qoldy qylǵan.