Ulttyq bank tóraǵasy Ǵalymjan Pirmatov kúrdeli geosaıası ahýal jaǵdaıynda qarjylyq jáne baǵa turaqtylyǵyn qamtamasyz etý jónindegi sharalary týraly aıtty.
«Jaǵdaı óte qıyn, belgisizdik deńgeıi de orasan. Syrtqy sektorda eń jaǵymsyz qaýip-qaterler men geosaıası turǵyda táýekelder paıda boldy. Biz úkimetterdiń, ortalyq bankterdiń, qarjy jáne basqa da uıymdardyń Reseı Federasııasyna qarsy sanksııalarǵa qatysty málimdemelerin baqylap, osy sanksııalardyń Qazaqstanǵa qalaı áser etetinin baǵalap otyrmyz. Qazaqstanda qarjy jáne baǵa turaqtylyǵyn qamtamasyz etý úshin barlyq qajetti sharany qabyldaıtyn bolamyz», dedi Ǵ.Pirmatov.
Aqpan aıynda bazalyq mólsherlemeniń 13,5%-ǵa deıin kezekten tys kóterilý sebepterin túsindirgen Ulttyq bank basshysy Reseı negizgi saýda áriptesimiz ekenin, rýbl baǵamynyń álsireýi teńgege de qysym kórsetkenin, mundaı jaǵdaıda Qazaqstanda bazalyq mólsherlemeni jedel arttyrý syrtqy kúızelister saldarynyń el ekonomıkasyna taralýynyń aldyn alýǵa qajetti shara bolǵanyn atap ótti.
«Biz qabyldaǵan jedel sheshim teńgeniń aıyrbastaý baǵamyna kórsetiletin qysymdy, atap aıtqanda, alypsatarlyq qysymdy tómendetýge múmkindik berip, ınflıasııalyq jáne devalvasııalyq kútýlerdiń ósýin boldyrmaýǵa baǵyttaldy. Mundaı daǵdarys jaǵdaılarynda jaýapkershilikti óz moınymyzǵa alýǵa daıyn ekenimizdi kórsetý mańyzdy. Biz óz áreketterimizdi, saýdadaǵy ózgerister men ıntervensııalar týraly aqparatty ashyq jarııalap, naryqpen bólisemiz. Meniń oıymsha, bul dál qazir óte mańyzdy. Bul bizge aqsha-kredıt saıasatyn júrgizýge kómektesedi: ashyq dıalog pen is júzindegi áreketterimizdiń jarııalylyǵyna qarap-aq, naryqtyń kásibı qatysýshylary Ortalyq banktiń ne istep jatqanyn jáne Qazaqstanda qarjylyq turaqtylyqty saqtaý úshin qajetti barlyq sheshimdi qabyldaýǵa daıyn ekenin bilgeni jón», dedi Ulttyq bank tóraǵasy.
Ǵ.Pirmatov qazirgi bazalyq mólsherlemeni saqtaý jóninde sheshim qabyldaýǵa áser etken faktorlar týraly aıta kelip, kúrt ózgerip jatqan jaǵdaıdy jáne buryn-sońdy bolmaǵan belgisizdik deńgeıin eskerip, belgili bir ýaqytqa úzilis jasalǵanyn jetkizdi. Bul ýaqyt negizgi ishki jáne syrtqy makroekonomıkalyq ındıkatorlardyń osy kútpegen ózgeristerge yqpaly jóninde jańa aqparat jınaýǵa múmkindik beredi.
«Ahýal túbegeıli nasharlaǵan jaǵdaıda bizde paıyzdyq saıasat sheńberinde budan bylaıǵy sheshimder qabyldaý úshin keńistik saqtalyp otyr. Eger qarjy naryqtarynda qubylmalylyq artatynyn kóretin bolsaq, biz qarjy turaqtylyǵyna nuqsan keltirmesten, aqsha-kredıt talaptaryn eleýli túrde kúsheıte alamyz», dedi ol.