Sońǵy jyldary Baıanaýyl baýraıynda jel sál kúsh alsa, jaryq óship qalatyn «dástúr» paıda boldy. Aýdan ortalyǵyndaǵy ahýal bul. Shalǵaıdaǵy aýyl turǵyndary da jaryqtyń sharapatyn sezinip otyrǵany shamaly. Týrısterdi tartýdan buryn sapaly jaryq tartyp alǵan durys-aý.
Baıanaýyl aýylynyń turǵyny, qoǵam belsendisi Aıbat Ydyrysov aýa raıy qubylsa, baıanaýyldyqtar shaınekterin qaınatyp, uıaly telefondaryn qýattaýǵa asyǵatynyn aıtty. Jaryq sónse, qaı ýaqytta qosylatynyn eshkim bilmeıdi.
– Aýdandaǵy elektr júıesine qaı mekeme jaýapty ekenin uǵyna almaı qoıdyq. Kim jaýapty bolsa da, jyl saıyn jóndeý jumystaryn júrgizip, olqylyqtyń ornyn toltyrý kerek qoı. Jaryq nege jıi sónedi? Symdar eskirgen shyǵar, ózge de tehnıkalyq sebepter bolýy múmkin. Osy jaıly turǵyndarǵa durys aqparat beretin maman joq. Al aı saıynǵy túbirtekte jaryq kórsetkishi boıynsha artyq soma eseptelse, jaryqpen «jarylqaıtyndardy» sotqa berseń de jeńe almaısyń. El Prezıdenti Qasym-Jomart Toqaev «Halyq únine qulaq asatyn memleket» tujyrymdamasyn qabyldap, turǵyndarmen ashyq dıalog ornatýdy tapsyrǵan edi. Olar bolsa, áli kúnge deıin jaryq máselesi boıynsha halyq aldynda esep bergen emes. Aýdan ákimdigi de mardymdy eshteńe aıta almaıdy, – deıdi Aıbat Ydyrysov.
Turǵyndardyń bazynasyn tyńdap, birden aýdan ákimi Serik Batyrǵojınovqa habarlastyq. Ol bul qyzmetke taǵaıyndalǵanyna kóp ýaqyt bolmasa da, atalǵan máseleden habardar ekenin jetkizdi.
– Eseptik kezdesýler kezinde barlyq aýyldy aralap shyqtym. Shynymen de jaryq máselesi ózekti. Kóp jerde elektr baǵandary ótken ǵasyrdyń 80-jyldary salynyp, ábden tozǵan. Bul iske jaýapty aımaqtaǵy monopolıst uıym – «Pavlodarenergosbyt» JShS basshylyǵymen baılanys ornatyp, jańǵyrtý jobalaryn qolǵa almaqpyz. Bıyl Aqsań, Leker jáne taǵy úsh eldi mekende elektr júıesin retke keltirý jumystary jalǵasady. Osylaısha, kezeń-kezeńmen barlyq aýyldaǵy jaryq máselesin sheshetin bolamyz, – dep sendirdi aýdan basshysy.
Aımaqtaǵy monopolısterdiń keýdesin kerip, murnyn kókke shúıirgenin talaı kórdik. Tipti «qyzmet kórsetýden bas tartamyz» dep jylýǵa jaýapty mekemeniń oblys ákimine ses kórsetkeni bar. Aıtpaǵymyz, Baıanaýyldaǵy jaryq máselesi jarty jolda qalyp qoımasa eken.
Pavlodar oblysy,
Baıanaýyl aýdany