QR Premer-Mınıstri Álıhan Smaıylovtyń tóraǵalyǵymen ótken Investısııalyq ahýaldy jaqsartý jónindegi keńes (IAJK) otyrysynda klımattyq pakti boıynsha mindettemelerdi qarjylandyrý jáne «jasyl kún tártibin» ilgeriletýdegi Qazaqstannyń halyqaralyq ustanymdaryn odan ári nyǵaıtý máseleleri qaraldy, dep habarlaıdy Egemen.kz.
Qazaqstan alǵashqylardyń qatarynda Parıj kelisimin ratıfıkasııalady jáne ekonomıkany dekarbonızasııalaý jónindegi eleýli maqsattary týraly jarııalady. QR Úkimeti zamanaýı talaptarǵa saı keletin damýdyń jańa baǵyttaryna qatysty negizgi qujattardy daıyndaý boıynsha edáýir jumys atqaryp jatyr.
Á. Smaıylov 2021 jyly memlekettik ekologııalyq retteý standarttaryn aıqyndaıtyn, jasyl ınvestısııalar tartýdy yntalandyratyn jáne halyqaralyq ekologııalyq mindettemelerdiń oryndalýyn qamtamasyz etetin jańa Ekologııalyq kodeks qabyldanǵanyn atap ótti.
«Ekologııalyq taza energııa kózderin damytýdy yntalandyrý úshin Balamaly energetıkany damytý boıynsha jańa zań ázirlenip jatyr. Qazaqstannyń 2025 jylǵa deıingi ınvestısııalyq saıasatynyń jańa tujyrymdamasy ESG jáne jasyl ekonomıka qaǵıdattaryn saqtaýǵa negizdeletin bolady», dedi QR Premer-Mınıstri.
Osy maqsattar úshin qazirgi tańda 2060 jylǵa qaraı Kómirtegi beıtaraptylyǵy doktrınasy ázirlenýde, ol Qazaqstan ekonomıkasyn dáıekti túrde transformasııalaý jónindegi memlekettik saıasattyń strategııalyq baǵytyn aıqyndaıdy.
Qazaqstan álemde oryn alyp jatqan syn-tegeýrinderge qaramastan, óziniń jahandyq ornyqty damýǵa beıildiligin saqtap qaldy jáne atalǵan baǵyttaǵy júıeli jáne dáıekti jumysty odan ári jalǵastyrýǵa daıyn.