Birlesip sheshken is tıimdi

Advokattyń abyroıy nemen ólshenedi? Olar kimderge táýeldi? Memleket kepildik bergen zań kómeginiń quny qansha? MKZK (memleket kepildik bergen zań kómegi) baǵdarlamasy boıynsha mınýttyq tólemnen saǵattyq tólemge kóshý advo­kat­tyq qyzmettiń sapasyn arttyra ala ma? Osy jáne ózge de ma­ńyzdy suraqtar keńinen sóz bolǵan basqosýǵa Ádilet mınıs­tri Qanat Mýsın, Máji­­lis depýtaty Snejanna Ima­­sheva, Respýblıkalyq advokat­­tar alqasynyń tór­aǵasy Aı­dyn Bıkebaev, Jo­ǵar­ǵy sot, Bas prokýratýra, Sybaı­las jemqorlyqqa qarsy is-qı­myl jáne Qarjy monıto­rıngi agenttikteri, Ulttyq eko­nomıka, Qarjy, IIM ókil­deri, Respýblıkalyq notarıat­tyq palatanyń, Jeke sot oryn­daýshylarynyń respýblıkalyq palatasynyń ókilderi, sondaı-aq beınekonferens baılanys rejiminde Respýblıkalyq advokattar alqasy tóralqasynyń, zań konsýltanttary palatalary qaýymdastyqtarynyń músheleri jáne aýmaqtyq ádilet departamentteriniń basshylary qatysty. Sondaı-aq dóńgelek ústel jumysyna Adam quqyqtary jónindegi ýákil Elvıra Ázimova men Prezıdent janyndaǵy Keshirim jasaý máseleleri jónindegi komıssııa tóraǵasy Marat Ba­shı­mov qatysyp, advokattyq zań kómegin kórsetý júıesindegi negizgi máseleler boıynsha oı-pikirlerin ortaǵa saldy.

Is-sharada advokattardyń penıtensıarlyq júıemen ózara árekettesý máseleleri, atap aıtqanda, advokattardyń ter­geý ızolıatorlaryna kirýi, qylmys­tyq-atqarý júıesi mekeme­lerindegi adamdarǵa advokat­tyq qyzmet kepildikteri men qorǵaý­shylardyń is júrgizý ókilet­tikterin keńeıtýge qatysty ózekti suraqtar jan-jaqty tal­qylandy. Zań qyzmetterin kórsetý salasyn jetildirý, sapasyn arttyrý boıynsha naqty usynystar aıtyldy. Máselen, Respýblıkalyq advokattar alqasynyń tóraǵasy Aıdyn Bıkebaev memleket kepildik bergen zań kómegi baǵdarlamasy aıasynda memlekettik bıýdjettiń tólem mólsherlemelerin arttyrý jáne shyǵystaryn ulǵaıtýdy usyndy. Naqtyraq aıtqanda, ol osy baǵdarlama boıynsha mınýttyq tólemnen saǵattyq tólemge kóshýdi, demalys, mereke jáne túngi ýaqyttaǵy ju­mysy úshin advokatqa buryn be­rilgen joǵary tólemdi qaı­tarý qajettigin alǵa tartty. So­nymen qatar is-shara aıasynda advokattardyń «E-Zań kómegi» aqparattyq júıesin paıdalaný, quqyq qorǵaý organdary ǵı­marattarynda smartfondar men noýtbýkterdi qoldaný, «memlekettik qupııa» dep tańbalanǵan ister boıynsha ruqsat alý kezinde týyndaıtyn kedergiler men máselelerdi sheshý qajettigi de aıtyldy.

«Respýblıkalyq advokattar alqasy kótergen máselelerdiń denin dóńgelek ústelge qaty­sý­shylar qoldady. Aldaǵy kúnderi naqty merzimder men oryndaýshylardy kórsete otyryp, basqosý barysynda talqylanǵan máselelerdi sheshý boıynsha Jol kartasyna qol qoıylady», deıdi A.Bıkebaev. Dóńgelek ústelge qatysýshylar mundaı kezdesýler advokatýrany odan ári damytý baǵyttary men halyqqa zań qyzmetterin kórsetý sapasyn, sonymen qatar memleket kepildik bergen zań kómegin jaqsartý jónindegi naqty sharalardy ázirleýge múmkindik beretinine senim bildirdi. Talqylaý barysynda aıtylǵan usynystardy iske asyrý jónindegi naqty sharalar Jol kartasynda kórsetiledi.