Qoǵam belsendisi, Jambyl oblysyndaǵy Baızaq aýdandyq ardagerler keńesi janyndaǵy áleýmettik máseleler jónindegi turaqty komıssııanyń tóraǵasy Serik Balabekovtiń is-tájirıbesi oblystyq ardagerler keńesiniń tóralqa otyrysynda arnaıy talqylanyp, onyń oblys kóleminde atqaryp otyrǵan jaqsy isterin keńinen taratý jóninde qaýly qabyldandy.
Halyqqa paıdaly ıgilikti isterdiń basy-qasynda qashanda qarııalardyń júrýi, árıne, qýantarlyq jaıt. Qandaı da bir isti bastar aldynda aýzy dýaly, sózi ótimdi aqsaqaldardyń batasyn alý – ár qazaqqa tán qasıet. Sonda tirlik – tııanaqty, eńbek – jemisti, is nátıjeli bolady. Qazir ardagerler uıymdarynda osy jaqsy dástúr jalǵasyn taýyp jatyr.
Baızaq aýdandyq ardagerler keńesiniń bastamasymen ashylǵan áleýmettik qyzmet kórsetý ortalyǵy Serik Balabekovtiń belsendiliginiń arqasynda birqatar ıgi is asqaryp otyr. Ortalyqqa turǵyndardyń buryn paıdalanǵan buıymdary men jańalary da qabyldanyp, áleýmettik qoldaýǵa muqtaj jandarǵa tegin taratylady. Taratýǵa qabyldanatyn zattardyń ishinde kıim-keshek, qural-saıman, turmystyq tehnıka, jıhaz, túrli tósenishter, ydys-aıaq, tipti oıynshyqtar da bar.
Serik Balabekovtiń qoǵamdyq jumystardaǵy belsendiligi men is-tájirıbesi ózgelerge úlgi etýge, nasıhattaýǵa laıyq. Onyń bitimgershiliginiń arqasynda talaı shańyraqtyń shaıqalmaýyna, syılastyqqa syzat túspeýine, daýly máselelerdiń ońdy sheshilýine qol jetkizildi. Olaı bolsa, ardager aǵanyń ardagerler uıymyndaǵy belsendi qyzmeti de eskerýsiz emes. Ol – «Jambyl oblysynyń qurmetti ardageri» tósbelgisiniń ıegeri. Prezıdenttik saılaýlarda senim bildirilgen adam. Parlamenttik, oblystyq jáne aýdandyq máslıhattar saılaýlarynda komıssııa múshesi bolǵany úshin respýblıkalyq bılik partııasynyń Alǵys hatymen, partııa oblystyq fılıalynyń Maqtaý qaǵazymen marapattalǵan. Sondaı-aq eńbegi III dárejeli «Úzdik medıator» dıplomymen atap ótilgen.
Tóle NARJANOV,
aýdandyq tarıhı-ólketaný mýzeıiniń qyzmetkeri
Jambyl oblysy,
Baızaq aýdany