Elordada Naýryz merekesine oraı 100-den astam is-shara ótkiziledi. Qala turǵyndary men qonaqtary konsertterge, merekelik baǵdarlamalarǵa, kórmelerge, qoıylymdarǵa, ulttyq sport túrleri boıynsha jarystarǵa qatysa alady, dep habarlaıdy Egemen.kz Nur-Sultan ákimdiginiń resmı saıtyna silteme jasap.
Qalanyń tórt aýdanynda Naýryz meıramy atap ótiletin 20 –dan astam oryn belgilendi.
22 naýryzda saǵat 11:00-den 15:00-ge deıin barlyq aýdanda, sonyń ishinde elordanyń eldi mekenderinde «Naýryz-dýman - 2022» atty mádenı-buqaralyq is-sharalar uıymdastyrylady. Is-sharada vedomstvolyq baǵynysty uıymdardyń ártisteri men shyǵarmashylyq ujymdardyń qatysýymen konserttik baǵdarlama, túrli kostıým kıgen keıipkerler men qýyrshaqtar shoýynyń baǵdarlamasy usynylady. Sondaı-aq jınalǵan qaýym arqan tartý, asyq oınaý, toǵyz qumalaq sııaqty ulttyq sport túrleri boıynsha jarystarǵa qatysa alady. Bul kúni merekeniń basty belgisi – Naýryz kóje ulttyq taǵamy da jurtshylyqqa taratylady.
Almaty aýdanynda josparlanǵan merekelik is-sharalar «Qazaq Eli» monýmenti alańynda, «Stýdentter» saıabaǵynda, Baıqońyr aýdanynda – «Atatúrik» saıabaǵynda, Jazýshylar alleıasynda, Esil aýdanynda – EKSPO aýmaǵynda jáne Úrker eldi mekeninde, sondaı-aq, Saryarqa aýdanyndaǵy – «Kóktal» saıabaǵynda jáne Demalys promenade alańynda ótedi.
Aıta ketsek, 18-19 naýryzda qalada áleýmettik az qamtylǵan, kópbalaly otbasylarǵa, jalǵyz basty qart adamdarǵa jáne halyqtyń áleýmettik osal toptarynyń basqa da sanattaryna azyq-túlik sebetterin taratý josparlanýda.
Sonymen qatar 19 naýryz kúni saǵat 11:00-de elordanyń Dostyq Úıi alańynda Qazaqstan halqy Assambleıasy qala turǵyndary úshin «Qosh keldiń, áz Naýryz!» is-sharasyn ótkizedi. Qonaqtardy konserttik baǵdarlama, qoldanbaly óner boıynsha master-klastar, jármeńke jáne ulttyq sporttyq oıyndar boıynsha jarystar ótedi.
Dostyq úıinde kıiz úıler men altybaqan ornatylyp, naýryz kóje daıyndalady. Kıiz úılerdiń ishinde elordalyq etnomádenı birlestikterdiń ulttyq naqyshtaǵy ekspozısııalary qoıylady. Sondaı-aq árbir kıiz úıde qoldanbaly óner boıynsha sheberlik synyptary kórsetiledi.
Saǵat 12:00-de «Buqa tartys», «Asyq oınaý», «Gir kóterý», «Qazaqsha kúres», «Qol kúres» baǵyttary boıynsha ulttyq sporttyq jarystar bastalady. Jarys qorytyndysy boıynsha jeńimpazdarǵa aqshalaı syılyqtar beriledi.
Konserttik baǵdarlamamen elordanyń etnomádenı ortalyqtarynyń kásibı, kórkem ujymdary óner kórsetedi.
18-31 naýryz aralyǵynda qýyrshaq teatry «Naýryz-dýman» qýyrshaqtar shoýyna shaqyrady. Qoıylymdardyń bastalý ýaqyty: 10:00, 12:00, 14:00 jáne 16:00.
Qalanyń ortalyqtandyrylǵan kitaphana júıesi de merekeden tys qalǵan joq. Qalalyq kitaphanalar kún saıyn Naýryz meıramyna oraı is-sharalar ótkizedi.
17 naýryzda №3 balalar kitaphanasy «Jasaı ber, áz Naýryz» aqparat saǵatyn, al №4 balalar kitaphanasy – «Kóńil kóteremiz, Naýryz merekesin qarsy alamyz» merekelik kaleıdoskopyn, sondaı-aq «Naýryz – birlik, beıbitshilik jáne jańarý merekesi!» is-sharalaryn ótkizedi.
Dál osy kúni №5 buqaralyq kitaphanada «Sálem, Naýryz!», Ortalyq qalalyq kitaphanada – «Jarqyra, jaına, Naýryzym!», №9 buqaralyq kitaphanada – «Ulystyń uly kúni – Naýryz» keshi uıymdastyrylady. Sonymen qatar №4 buqaralyq kitaphanada «Naýryz-dýman» ulttyq tarıh saǵaty, №7 buqaralyq kitaphanada «Armysyń, áz Naýryz! Aq mol bolsyn!», № 8 balalar kitaphanasyna «Naýryz keledi!» is-sharasy ótkiziledi.
19 naýryzda № 3 buqaralyq kitaphanada «Ulystyń uly kúni – Naýryz» áńgime-oıynyn, №2 buqaralyq kitaphanada «Nur sebele – ulystyń uly kúni» merekelik keshin, №10 buqaralyq kitaphanada «Qazaqsha stıldegi defıle» tarıh saǵatyn, №15 buqaralyq kitaphanada «Ulystyń uly kúni – Áz Naýryz!» kitap kórmesin uıymdastyrý josparlanýda.
Sáken Seıfýllın murajaıy osy aptada áleýmettik jelilerde Naýryz meıramy men Qazaq ulttyq dástúrlerine arnalǵan onlaın formatta is-sharalar ótkizedi.
Al 25 naýryzda elordanyń Memlekettik Akademııalyq fılarmonııada «Naýryz syıy» Ulttyq syılyǵy ótedi. Joba tek mádenıetti ǵana emes, sonymen birge ulttyq baılyqtyń alýan túrliligin bildiretin halyq sheberlerine arnalǵan.
Sonymen qatar, 18-22 naýryz aralyǵynda Arnasaı kóshesi, 109 boıyndaǵy saýda pavılonynyń aýmaǵynda Naýryz merekesine oraı úlken aýyl sharýashylyǵy jármeńkesi uıymdastyrylady. Al ondaǵy baǵalar bazar baǵasynan 15%-ǵa tómen bolady.