QR Eńbek jáne halyqty áleýmettik qorǵaý mınıstri Serik Shapkenov QR Prezıdenti janyndaǵy jastar saıasaty jónindegi keńestiń otyrysynda Memleket Basshysynyń tapsyrmalaryn oryndaý aıasynda jastardy jumyspen qamtý boıynsha qabyldanyp jatqan sharalar týraly aıtty, dep habarlaıdy Egemen.kz QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
«2021 jyldyń 4 toqsanyndaǵy jaǵdaı boıynsha jastardyń ekonomıkalyq belsendi bóligi 1,9 mln. adamdy quraıdy, olardyń 96,3% jumyspen qamtylǵan. Respýblıka boıynsha jumyssyzdyqtyń jalpy deńgeıi 4,9% bolsa, jastar jumyssyzdyǵy edáýir tómen deńgeıde jáne 3,7% nemese 73,3 myń adamdy quraıdy. Budan basqa, 2020-2021 jyldary NEET jastarynyń úlesi 7,1% – dan 6,7% - ǵa deıin tómendedi, bul ishinara bilim berý jáne jumyspen qamtý salasyndaǵy memlekettik jastar saıasatyn tabysty iske asyrýdy kórsetedi», dep habarlady EHÁQM basshysy.
Mınıstr sońǵy 5 jyl ishinde jastardy jumyspen qamtýǵa járdemdesý sharalary nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek« memlekettik baǵdarlamasy aıasynda iske asyrylǵanyn eske saldy. Osy kezeńde qoldaý sharalary 1 mıllıonnan astam jastarǵa kórsetildi, olardyń jartysy turaqty jumysqa ornalasty.