Jartylaı aýyr salmaq dárejesindegi álemniń burynǵy chempıony, reseılik bylǵary qolǵap sheberi Sergeı Kovalev meksıkalyq Saýl Alvareske qarsy ótkizgen jekpe-jek týraly pikirimen bólisti, dep habarlaıdy Egemen.kz Fightnews.info-ǵa silteme jasap.
«Meksıkalyq boksshyǵa qarsy shaıqas aldynda maǵan salmaq jasaý óte qıyn bolǵan edi. О́ıtkeni men az ǵana ýaqyt buryn sharshy alańǵa shyqqanmyn. Alvareske qarsy shaıqasqa mende segiz apta ǵana boldy. Al men eki-úsh apta demalys suradym. Onyń komandasy «joq» dep jaýap berdi. Aıtqanyna kelisip, rıngke kóterildim.
Bolǵan dúnıe boldy, boıaýy sińdi. Bastysy boksshy retinde myqty qarsylastardan eshqashan qashqan emespin. Barlyq synaqtarǵa qarsy tura bilgenim úshin keýdemdi maqtanysh sezimi kerneıdi. Men onyń komandasyna qarymta jekpe-jek ótkizý máselesimen qaıyryldym. Alaıda olar jaýap bergen joq. Jańa bıikti baǵyndyrý maqsatymen birinshi aýyr salmaq dárejesine kóterildim. Sol maqsat jolynda ter tógip jatyrmyn», dedi sportshy Fight Hub TV ıýtýb arnasyna bergen suhbatynda.