Petropavl jylý-elektr ortalyǵy jumysshysyn izdeý jumystary bir sát toqtaǵan joq, alaıda ázirge nátıjesiz, dep habarlaıdy Egemen.kz.
Petropavldaǵy jylý ortalyǵynyń murjasy qulaǵan kezde úıindi astynda qalǵan mashınıst-qaraýshy áli tabylǵan joq. Soltústik Qazaqstan oblysy ákimi baspasóz qyzmetiniń málimetinshe, 38 jastaǵy áıeldi izdestirý jumystary jalǵasyp jatyr. Ázirge nátıje joq.
«Qaýipsizdikti qamtamasyz ete otyryp izdeý jumystaryn túni boıy jalǵastyrý josparlanǵan. Qazirgi ýaqytta jylý ortalyǵynda 4 qazandyq agregaty jumys istep tur. Jylýmen qamtý kórsetkishteri qalpyna kelip jatyr», dedi oblys ákiminiń baspasóz hatshysy Tımýr Ábdireshov.
Buǵan deıin tótenshe jaǵdaılar departamentiniń bastyǵy Ramıl Kamalov qutqarýshylardyń úıindilerdi qolmen qoparyp jatqanyn aıtqan edi. Qutqarýshylar qurylymdar qulaıtyn bolǵandyqtan ınjenerlik tehnıkany paıdalanyp jatqan joq. Úıindi astynda qalǵan áıeldi izdeýge kınologııalyq qyzmet te tartylǵan.
Esterińizge sala keteıik, 20 naýryz kúni Petropavldaǵy JEO-da úsh tútin murjasynyń biri opyrylyp qulady.