Monpelede óner kórsetedi

Qazirgi kezde osy sport tú­ri­nen qaı memlekettiń qarqyny kúshti ekenin anyqtaý úshin tarıhty qoparmaı-aq, sońǵy 10-12 jyl sheńberinde ótken álem chempıonattarynyń nátıjelerine zer salsaq ta jetkilikti. Sol ara­lyq­ta tórtkúl dúnıeniń ár qıy­rynan jınalǵan mánerlep syr­ǵa­naý­shylardyń qatysýymen ótken dúbirli dodanyń shy­myl­dy­ǵy 11 márte túrildi. Erler jaıynda aıtar bolsaq, alǵashynda 2010 jyly Týrınde japonııalyq Daısýke Tahakası top jardy. 2014 jáne 2017 jyldary Japonııanyń taǵy bir juldyzy Iýdzýrý Hanıýǵa teń keler eshkim tabylmady. Sol aralyqta ıspanııalyq Haver Ernandestiń de juldyzy jarqyraı jandy. Pıreneı túbeginiń tarlany 2015 jyly Shanhaı men 2016 jyly Bostonda bas júldeni qanjyǵasyna baılady. AQSh-ta dúnıege kelip, sol eldiń týy astynda óner kórsetken qytaılyq Neıtan Chenniń sońǵy úsh jarysta shoqtyǵy bıik boldy. Ol Mılan, Saıtama jáne Stokgolmde altyn tuǵyrdan qol bulǵady. Byltyr Skandınavııa túbeginde ótken básekede Chen teńdessiz dep tanylsa, ekinshi jáne úshinshi oryndardy Kún shyǵys eliniń qos qyrany – Iýma Kagıama men Iýdzýrý Hanıý ózara bólisti.

Áıelder arasynda sońǵy 11 álem chempıonatynyń beseýinde Reseı sportshylary qarsylas shaq keltirmedi. Atap aıtsaq, 2015 jyly Elızaveta Toqtamysheva, 2016 jáne 2017 jyldary Evgenııa Medvedeva, 2019 jyly Alına Zagıtova jáne 2021 jyly Anna Sherbakova syndy arýlar altynnan alqa taqty. Úsh ret japon qyzdary jeńimpaz atandy. Olar – Mao Asada (2010, 2011 jyldary) men Mıkı Ando (2014). Sondaı-aq ıtalııalyq Karolına Kostner (2012), koreıalyq Kım En A (2013) jáne kanadalyq Ketlın Osmond (2018) bir-bir retten sondaı qurmetke bólendi. Byltyr Stokgolmde uıymdastyrylǵan básekede júldeli oryndardyń barlyǵyn reseılikter ıelendi: Anna Sherbakova – altyn, Elı­za­veta Toqtamysheva – kúmis jáne Aleksandra Trýsova – qola.

2010 jyldan bergi ýaqytta jup­tyq saıysta myna sport­shy­lardyń mereıi ústem boldy: Pan Sın/Týn Szıan (Qytaı. 2010), Alena Savchenko/Robın Sholkovy (Germanııa. 2011, 2012, 2014), Tatıana Volosojar/Maksım Tarankov (Reseı. 2013), Megan Dıýamel/Erık Redford (Kanada, 2015, 2016), Sýı Venszın/Han Sýn (Qytaı. 2017, 2019), Alena Savchenko/Brýno Masso (Germanııa. 2018) jáne Anastasııa Mıshına/Aleksandr Gallıamov (2021. Reseı). Al sporttyq bıden ótken saıys­tarda bas júlde myna sańlaqtarǵa buıyrdy: Tessa Vertıý/Skot Moır (Kanada. 2010, 2012, 2017), Merıl Devıs/ Charlz Ýaıt (AQSh. 2011, 2013), Anna Kappellını/Lýka Lanotte (Italııa. 2014), Gabrıela Papadakıs/Gııom Sızeron (Fransııa. 2015, 2016, 2018, 2099) jáne Vıktorııa Sınısına/Nıkıta Kasalapov (Reseı, 2021).

Qazaqstannyń mánerlep syr­ǵa­naýshylary álem chempıo­nat­tarynda úsh ret jeńis tuǵy­ry­na kóterildi. 2013 jyly Lon­don qalasynda ataǵy alysqa jaıylǵan Patrık Channan ǵana qalyp qoıǵan Denıs Ten kúmis medaldy moınyna ildi. Dál sol Denıs 2015 jyly Qytaıdyń Shanhaı shaharynda jalaýy jelbiregen jarysta Haver Ernandes pen Iýdzýrý Hanıýdy alǵa jiberip, qola júldeni ıelendi. Osydan úsh jyl buryn Japonııanyń Saıtamasynda Elızabet Tursynbaeva kúmis medaldy oljalap, kúlli Alash jurtyn qýantty. Qazaq qyzy tek Olımpıada chempıony Alına Zagıtovaǵa ǵana ese jiberdi.

Bul jolǵy jarysqa bas­ty favorıtterdiń biri – Reseı quramasy qatyspaıdy. Sebebi Ýkraınadaǵy jaǵdaıǵa baılanys­ty atalǵan memlekettiń ókilderi kóptegen sport túrleri boıynsha ótetin halyqaralyq jarystardan shettetildi. Reseıliktermen qatar Belarýs sportshylaryna da dál sondaı qatań shara qol­da­nyldy.

Jalpy, Monpeledegi báse­ke­de Reseıdiń – 12, AQSh-tyń – 11, Japonııanyń – 8, Kanadanyń – 7, Italııanyń – 5, Ońtústik Koreıanyń – 4, Qytaıdyń – 3, Belgııa, Aýstrııa, Ulybrıtanııa jáne Fransııanyń 2 sportshysy baq synaý qurmetine bólendi. Sondaı-aq taǵy birneshe memlekette bir-bir joldamadan bar. Alaıda joǵaryda aıtylǵan shek­teýge baılanysty Reseı men Belarýs quramalarynyń ornyn basqa eldiń órenderi bas­ty. Desek te, odan jarystyń qyzyǵy esh kemip qalmaıdy degen oıdamyz. О́ıtkeni ádemilik pen ásemdikke negizdelgen sport­tyń bul túrinde jasyndaı jar­qyldap júrgen juldyzdar jetip artylady.