Joldaýdy júzege asyrý tetikteri anyqtaldy

Atap aıtqanda, Memleket basshysy Qasym-Jomart Toqaev Jańa Qazaq­stan­dy qalyptastyrýǵa baǵyttalǵan birqatar mańyzdy saıası reformalardy usyndy.

Amanat partııasynan Májilis depýtattary, sondaı-aq oblystyq jáne qalalyq deńgeıdegi máslıhattardyń 500-den astam depýtaty qatysqan Jas depýtattar korpýsynyń otyrysynda elimizdiń qoǵamdyq-saıası ómirindegi aldaǵy transformasııadaǵy jastardyń róli qandaı ekendigi anyqtaldy.

Talqylaýǵa qatysqan Májilis depý­ta­ty Gennadıı Shıpovskıh: «Búgin el da­mýynyń saıası modeli qaıta qaral­dy. Olar­dyń ishinde qoǵamdy demo­kratııalandyrýǵa baǵyt­talǵan Prezı­denttiń quzyretin shek­teý, zań qabyl­daýǵa qatysty Pa­rla­ment Máji­lisiniń, jergilikti ákim­derdi taǵa­ıyn­daýǵa baılanysty máslıhat­tardyń  rólin kúsheıtý máselesi bar», dedi ol.

Jas Otan jastar qanatynyń tóraǵasy Nurjan Jetpisbaev Prezıdent aıtqan bastamalarda jastardy qoldaýdyń naqty tetikteri aıqyndalǵanyn aıtty: «Partııanyń jastar qanaty retinde jastardyń azamattyq belsendiligin arttyrý bizdiń aldyńǵy qatarly josparlarymyzdyń biri. Sondyqtan búgin Memleket basshysy atap ótken memlekettik emes sektor ókilderin, azamattardy, belsendilerdi memleketti basqarý isine aralastyrý, sol maqsatta Ulttyq qoǵamdyq senim keńesiniń ornyna Ulttyq quryltaı qurý oryndy jáne onyń quramynda jastar da bolady dep senemiz. Tıisinshe, buǵan jastardyń atsalysýyn qamtamasyz etetin bolamyz. Sonymen qatar jastar qanatynyń «Qaısar», «О́rleý», «Partııalyq kontent-fabrıka», «Keńes ortalyǵy» jáne «Sátti qadam» syndy jobalaryn iske asyrý arqyly Memleket basshysynyń tapsyrmasyn oryndaý boıynsha jumystar júrgizilýde».

Sondaı-aq kezdesýge qatysýshylar jańa oblystardyń qurylýy jastar­ǵa oń yqpalyn beredi degen pikirlerin bildirdi. «Búgin shyǵysymyzda Abaı oblysynyń, ortalyqta Ulytaý oblysynyń jáne Jetisý oblystaryn qurý arqyly birinshi jaǵynan tarıhymyzdy jańǵyrtsaq, ekinshi jaǵynan elimizdegi aýmaǵy jaǵynan iri ákimshilik bólinisterdi basqarýdy uıymdastyrýǵa yńǵaıly bolmaq. Sebebi Almaty, Qaraǵandy, Shyǵys Qazaqstan oblystary kólemi ǵana emes, jastardyń shoǵyrlanýy jaǵynan da kóshbasshy aımaqtar. Osy oraıda atalǵan aımaqtardy bólý jastarmen naqty jumys isteý mehanızmin uıymdastyrýǵa yqpal etedi. Tıisinshe jańa jumys oryndary ashylyp, jastardyń saıası-mádenı, tulǵalyq damýyna jańa ınfraqurylymdar paıda bolyp, osyǵan deıin oblys orta­lyqtarynan alys ornalasqan aýyl­dardaǵy jastarymyz­dyń áleýmet­tenýine jaqsy múmkindik týyndamaq», dedi «Jastar» ǵylymı-zertteý ortaly­ǵy dırektorynyń orynbasary, Prezı­denttik kadrlyq rezerv múshesi Elına Paýlı.