Tobyl óńirine jumys saparymen kelgen Ulttyq ekonomıka mınıstri Álibek Qýantyrov Qostanaıdaǵy «Ybyraı» jel elektr stansasy men «AgromashHoldıng KZ» kásipornynyń jumysymen tanysty. Sondaı-aq mektep, balabaqsha sııaqty birqatar áleýmettik nysandardy aralap, óńir turǵyndarymen kezdesti.
Bıyl aqpan aıynda paıdalanýǵa berilgen «Ybyraı» jel elektr stansasy saǵatyna 50 MVt qýat óndiredi. Máselen, Qostanaı qalasy jazda saǵatyna 60 MVt, qysta 90 MVt elektr qýatyn tutynady. Al jelden toq alatyn alyp baǵanalar oblys ortalyǵyn jazda 90%, qysta 60% elektr qýatymen qamtı alady. О́ńirde bir aýdanǵa ortasha eseppen saǵatyna 15 MVt qajet ekenin eskersek, «Ybyraıdyń» qýaty 3 aýdandy toqpen qamtamasyz etýge erkin jetedi. Stansa basqarýshysy Almat Isenbaevtyń aıtýynsha, qazir jańa jel elektr stansasynda 16 adam turaqty eńbek etedi. Mamandar jel qondyrǵylarynyń jumysyn stansa keńsesindegi monıtordan baqylap otyrady. Keńse ǵımaratynda vahtalyq tártippen jumys isteıtin mamandar turatyn bólmeler jáne ashana bar.
Qostanaı aýdanyndaǵy jel elektr stansasynyń múmkindigin halyq sharýashylyǵyna paıdalanýdyń tıimdi joldaryn qarastyrý kerektigin aıtqan mınıstr odan keıin «AgromashHoldıng KZ» AQ-ǵa qarasty lokalızasııalyq ortalyqqa bardy.
О́tken jyly iske qosylǵan lokalızasııalyq ortalyq metall pishý, ııý, dánekerleý, boıaý jumystaryn atqarýmen qatar, mashına jasaý salasyna qajetti plastık komponentterdi jasap shyǵarady. «AgromashHoldıng KZ» lokalızasııalyq ortalyǵy – óndiristiń otandyq úlesin arttyrý boıynsha iske asyrylyp jatqan óńirdegi eń alǵashqy joba. 36 myń sharshy metr aýmaqqa ornalasqan zaýyttyń zamanaýı qurylǵylarmen jabdyqtalǵan ámbebap sheberhanalary, oqý ortalyǵy, ákimshilik-turmystyq kesheni men zaýyt jumysshylaryna arnalǵan jataqhanasy bar.
Zaýyt byltyr 406 «Esil» kombaınyn, 530 Lovol traktoryn qurastyryp shyǵardy. Munyń syrtynda, 600-ge jaqyn kombaın-traktorlarǵa tirkeletin aspaly qurylǵylarǵa arnalǵan 13 myńnan astam qosalqy bólshekter men agregattar óndirdi. Zaýyt basshylarynyń sózine súıensek, kásiporyndaǵy lokalızasııa deńgeıi sońǵy jyl ishinde 34 paıyzdan 43,3%-ǵa deıin jetken.
Vedomstvo basshysy jergilikti halyqpen kezdesip, kópshiliktiń jol jóndeý, baspana satyp alý týraly saýaldaryna jaýap berdi. Bul kezdesýge aýyl turǵyndary onlaın rejimde qosyldy.
– 2021 jyldyń qorytyndysy boıynsha el ekonomıkasynda 4% ósim bar. Ekonomıkadaǵy turaqty ósimdi qamtamasyz etý úshin birqatar mańyzdy sharalar qabyldadyq. Jeke bıznestegi óndiristi yntalandyrý úshin salyqtyq jeńildikter qarastyrylyp otyr. Máselen, jumysyn endi ǵana bastaǵan kásiporyndar úshin qosymsha qun salyǵy 70%-ǵa tómendetildi. Sondaı-aq áleýmettik kásipkerlik sýbektilerin qoldaý maqsatynda múlik salyǵynyń mólsherin tómendettik, – dedi mınıstr.
Birqatar jergilikti seriktestikterdiń basshylary mınıstrden kásipkerlikti damytý, nesıeni sýbsıdııalaý, sondaı-aq «Bıznestiń jol kartasy – 2025» baǵdarlamasy aıasynda ınfraqurylymdy damytý máseleleri jóninde surady. Olar «Damý» qorynyń banktik qaryzdardy sýbsıdııalaýǵa ótinim qabyldaýdy toqtatqanyna alańdaýly. Kásipkerlerdiń saýalyn naqtylap ótken oblys ákimi Arhımed Muhambetov bıyl óńir bıznesti damytýǵa bólingen qarjynyń syrtynda Ulttyq ekonomıka mınıstrliginen taǵy 2,670 mlrd teńge surap otyrǵanyn aıtty. Á.Qýantyrov kezdesýge qatysýshylarǵa óńirlik kásipkerlikti qoldaýǵa qolda bar múmkindikti aıap qalmaıtynyn, oblysqa qajet qosymsha qarjyny bólý týraly máseleniń taıaý arada oń sheshim tabatynyn aıtty.
– Mınıstrlik 2021-2025 jyldarǵa arnalǵan Kásipkerlikti damytý jónindegi ulttyq jobany iske asyrýda. Atalǵan joba boıynsha 3 mlrd teńgege deıin nesıe alǵan kásipkerlerge 6%-dyq jyldyq mólsherlememen sýbsıdııa beriledi. Sondaı-aq kredıtter boıynsha 360 mln teńgege deıin kepildik beriledi, – dedi Á.Qýantyrov.
Kezdesý barysynda «Dıplommen – aýylǵa» baǵdarlamasynyń iske asyrylý barysy talqylandy. Baǵdarlama boıynsha buryn aýylǵa jumys isteýge barǵan árbir jas mamanǵa 300 myń teńge kóterme aqy tólenip kelgen. Oblysta byltyrdan beri bul soma edáýir eselenip, asa zárý mamandyqtar boıynsha qalalyq mekenderge kelgen jastar 3 mln teńge, aýylǵa barǵan mamandar 5 mln teńge kóterme aqy ala bastady. Munyń syrtynda, aýylǵa jumysqa ornalasqan jas mamanǵa baspana satyp alý úshin taǵy 4,6 mln teńge tólenedi. Sońǵy kezderi oblys ortalyǵyna jaqyn aýyldardaǵy úı baǵasynyń qymbattap ketkenin alǵa tartqan jumys berýshiler mınıstrden «Dıplommen – aýylǵa» baǵdarlamasy boıynsha beriletin kóterme pul mólsherin kóbeıtý jaǵyn qarastyrýdy ótindi. Mınıstr bul máselege bıýdjet múmkindigin baǵamdap alǵannan keıin ǵana naqty jaýap bere alatynyn aıtty.
Qostanaı oblysy