QR Premer-Mınıstri Álıhan Smaıylov bıylǵy sý tasqyny kezeńiniń máseleleri jóninde keńes ótkizdi. Tótenshe jaǵdaılar mınıstri Iý. Ilın, Batys Qazaqstan oblysynyń ákimi Ǵ. Esqalıev, Aqtóbe oblysynyń ákimi O. Orazalın, Aqmola oblysynyń ákimi E. Marjyqpaev, Soltústik Qazaqstan oblysynyń ákimi Q. Aqsaqalov baıandama jasady, dep habarlady Egemen.kz.
Tótenshe jaǵdaılar mınıstri Iýrıı Ilınniń aıtýynsha, búgingi tańda Aqtóbe jáne Batys Qazaqstan oblystarynda kúrdeli jaǵdaı qalyptasyp otyr.
Sý tasqyny kezeńi bastalǵannan beri Aqtóbe, Batys Qazaqstan, Pavlodar, Qaraǵandy oblystarynyń 8 eldi mekeninde 184 turǵyn úı jáne 72 saıajaı úıleri, 2 áleýmettik nysan erigen qar sýynyń astynda qaldy.
«TJM men jergilikti atqarýshy organdardyń kúshimen Batys Qazaqstan, Pavlodar, Aqtóbe jáne Qaraǵandy oblystaryndaǵy 184 úıden, Aqtóbe qalasyndaǵy 17 saıajaı úıinen, sondaı-aq 2 áleýmettik nysannan sý shyǵaryldy. Sý basqan 57 saıajaı úıi baqylaýda tur. Búginde Qazaqstan óńirlerinde 969 adam evakýasııalandy, olardyń 493-i ýaqytsha panalaý pýnktterinde, 476-sy týystarynyń úılerine ornalastyryldy», dep habarlady Iý. Ilın.
TJM basshysynyń aıtýynsha, Aqtóbe oblysyndaǵy respýblıkalyq mańyzy bar joldyń bir ýchaskesin, oblystyq jáne jergilikti mańyzy bar 12 ýchaskeni sý basty, jergilikti mańyzy bar avtojoldardyń 15 ýchaskesin sý shaıyp ketti jáne Aqtóbe oblysyndaǵy bir kópir qırady.
Apattyq-qutqarý jumystaryna 2 myńnan astam adam, 500 tehnıka, sý sorǵysh quraldar men júzý quraldary jumyldyryldy.
Sý tasqyny jaǵdaıynyń kúrdelenýine baılanysty Batys Qazaqstan oblysyna Mańǵystaý jáne Atyraý oblystarynan TJM qosymsha qutqarý bólimsheleri, jeke quramnan 92 adam, 13 birlik tehnıka, júzý quraldary men motopompalar jiberildi.
Iý. Ilınniń aıtýynsha, oryn alǵan jaǵdaıǵa aýa-raıynyń kúrt jylynýy yqpal etti, bul qardyń tez erýine jáne egistikterden erigen qar sýlarynyń kelýine sebep boldy. Tek sońǵy aptada eldegi qar jamylǵysy 60-tan 40%-ǵa deıin tómendedi. Sońǵy jyldary klımattyń ózgerýine baılanysty elimizde bolyp jatqan prosester sý tasqyny jaǵdaıyna túbegeıli áser etedi, óıtkeni sońǵy 50 jyl jáne odan da kóp ýaqyt boıy sý basý máselesi bolmaǵan eldi mekenderde sý basý jaǵdaılary tirkelip jatyr.
Oryn alǵan jaǵdaıdyń negizgi sebepteri — qardyń ýaqytyly shyǵarylmaýy, sý ótkizý qurylystarynyń, drenajdyq nemese aryq júıeleriniń jetkiliksiz tazalanýy, ınertti materıaldar qorynyń daıyn bolmaýy.
Keńes qorytyndysy boıynsha QR Premer-Mınıstri óńirlerde qalyptasqan sý tasqyny jaǵdaıy ákimdikterdiń qardy ýaqytyly shyǵarmaýyna, kanaldar men aryqtardyń jetkiliksiz tazartylýyna, sý tasqynynyń aldyn alý sharalaryn qarjylandyrýdyń jetkiliksiz bolǵanyna baılanysty dedi.
Osy oraıda Batys Qazaqstan, Aqtóbe, Pavlodar jáne Qaraǵandy oblystarynyń ákimderi qaýipsiz jerge kóshirilgen azamattarǵa tıisti jaǵdaı jasap, erigen qar sýyn shyǵarý, sý astynda qalǵan úıler men ınfraqurylymdy qalpyna keltirý boıynsha jumystar júrgizýi kerek.
Taıaý kúnderi aýa temperatýrasy kóterilip, birqatar óńirde ahýal odan saıyn aýyrlaı túsýi múmkin. Osyǵan baılanysty Álıhan Smaıylov sý tasqynyna turaqty monıtorıng pen baqylaý jasap, qalyptasqan jaǵdaıǵa jedel áreket etýdi tapsyrdy.
«Sý tasqyny qaýpi bar ýchaskelerge jaqyn mańǵa arnaıy jáne ınjenerlik tehnıkany, qum salynǵan qaptardy jetkizý qajet. Sondaı-aq sý tasqyny kezinde kólik qatynasy shektelýi múmkin eldi mekenderdi anyqtap, ol jerlerde azyq-túlik ónimderi men aýyz sý qoryn daıyndaǵan jón», dedi Premer-Mınıstr.
Ekologııa mınıstrligi óńirlerdiń ákimdikterimen birlesip, sý qoımalarynyń jaı-kúıine, sondaı-aq sý tasqyny qaýpi bar ózenderdegi jaǵdaıǵa turaqty baqylaý ornatýy qajet. Qajet bolǵan jaǵdaıda sý qoımalaryn aldyn ala jáne qaýipsiz bosatý boıynsha sharalar qabyldaý kerek.
TJM Aqparat mınıstrligimen birlese otyryp, eldi mekenderdi sý basý jáne qaýipti aımaqtardan evakýasııalaý kezinde turǵyndardyń tıisti qaýipsizdik erejelerin saqtaý týraly aqparattandyrý jumystaryn jandandyrýy tıis.
Álıhan Smaıylov sondaı-aq óńirlerdiń ákimderine sý tasqyny barysyn qatań baqylaýǵa alýdy, kelesi jyly sý basý qaýpin edáýir tómendetý úshin 2021-2023 jyldarǵa arnalǵan Sý tasqynyna qarsy is-sharalardyń jol kartasyn iske asyrý boıynsha sharalar qabyldaýdy tapsyrdy.