Sý tasqyny kezeńi bastalǵannan beri tórt oblysta 185 turǵyn úıdi sý basyp, qutqarýshylar myńnan astam azamatty evakýasııalady, bes oblysta joldardy sý basty, dep habarlaıdy Egemen.kz Tótenshe jaǵdaılar mınıstrliginiń baspasóz qyzmetine silteme jasap.
«Sý tasqyny kezeńi bastalǵannan beri Aqtóbe, Batys Qazaqstan, Pavlodar, Qaraǵandy oblystarynda 185 turǵyn jáne 78 saıajaı úıdi, 2 áleýmettik nysandy erigen qar sýy basty. Barlyq 185 turǵyn úıden, 2 áleýmettik nysannan jáne Aqtóbe oblysyndaǵy 63 saıajaı úıden sý soryp shyǵaryldy. Qazirgi ýaqytta Aqtóbe oblysyndaǵy 15 saıajaı úı baqylaýda tur», delingen habarlamada.
Batys Qazaqstan, Aqtóbe, Pavlodar, Qaraǵandy oblystarynda barlyǵy 1 165 adam evakýasııalandy, onyń 676-y ýaqytsha evakýasııalaý pýnktterinde, 480 - týystarynyń úılerine ornalastyryldy, 9-y úılerine oraldy.
«Qazgıdromet» RMK derekteri boıynsha aldaǵy táýlikte Aqmola, Aqtóbe, ShQO, BQO, Qaraǵandy, Qostanaı, Pavlodar, SQO jáne Nur-Sultan qalalarynda jańbyr túrinde azdaǵan jaýyn-shashyn kútiledi, kúndizgi ýaqytta aýa temperatýrasy +6 +20S-qa deıin, túngi ýaqytta 0-den +10S-qa deıin kóteriledi. Osyǵan baılanysty ózen basseınderinde qarqyndy qar erýi, erigen aǵyn qalyptasýy, muz qubylystarynyń álsireýi jáne ózenderdegi sý deńgeıiniń kóterilýi múmkin.