Qazaqstandyq kásipqoı boksshy Gennadıı Golovkın (41-1-1, 36 KO) men japonııalyq Rıota Mýrata arasynda ótetin jekpe-jektiń naqty ýaqyty belgili boldy. Bul týraly boks keshin tikeleı efırde kórsetetin Qazsport telearnasy habarlady.
«Japonııanyń Saıtama qalasynda uıymdastyrylatyn Golovkın-Mýrata arasyndaǵy kásipqoı boks keshiniń translıasııasy 9 sáýirde Nur-Sultan ýaqytymen 15:00-de bastalady. Kezdesýdi teledıdardan bólek, qazaqstan.tv jáne qazsporttv.kz saıty men qazaqstan.tv mobıldi qosymshasy arqyly tikeleı efırde kórýge múmkindik bar», delingen resmı habarlamada.
Al negizgi jekpe-jektiń naqty ýaqyty ázirge belgisiz. О́ıtkeni barlyǵy anderkardta sharshy alańǵa shyǵatyn boksshylardyń kezdesýlerine baılanysty. Degenmen, beıresmı aqparat boıynsha, Golovkın-Mýrata aıqasy elorda ýaqytymen keshki 19:00 – 20:00 aralyǵynda bastalady dep kútilýde.
Aıta keteıik, bul jekpe-jekte Golovkınniń orta salmaqtaǵy IBF, IBO jáne Mýratanyń WBA Super chempıondyq belbeýleri sarapqa salynady.