Tennısten Qazaqstan áıelder quramasy alǵash ret Bıllı Djın Kıng kýbogynyń fınaldyq kezeńine shyqty, dep habarlaıdy Egemen.kz UOK-ke silteme jasap.
Búgin Qazaqstan men Germanııanyń birinshi raketkalary Elena Rybakına men Anjelıka Kerber óz eliniń namysy úshin synǵa tústi. Bul olardyń ózara alǵashqy kezdesýi edi.
«Úlken dýlyǵa» týrnıriniń úsh dúrkin chempıony, álemniń burynǵy birinshi, qazirgi 17-raketkasy, 34 jastaǵy A.Kerberdiń tájirıbesi mol ekendigi belgili. Odan reıtıngte eki saty tómen turǵan E.Rybakınaynyń jasy 22-de ǵana. Birinshi partııa barysynda jetinshi geımde germanııalyq tennısshi breık jasap ketti – 4:3. Sosyn osy basymdylyǵynan aıyrylǵan joq – 6:4. Ekinshi sette Kerberdiń qateliginen keıin Rybakına alǵa shyqty – 2:0. Partııany da óz paıdasyna sheshti – 6:3. Úshinshi, sheshýshi setti qazaqstandyq tennısshi breıkpen bastaǵanymen, qarsylasy sol boıda teńestirip úlgerdi – 1:1. Taǵy da breık almasý – 3:3. Budan keıin Kerber matchqa dop bergende, Rybakına qaıyra breık jasady – 4:5. Sodan keıin qarqynyn báseńdetken joq – 7:5. Tartysty ótken báseke eki saǵattan astam ýaqytqa sozyldy. Osylaısha, Qazaqstan esepti 3:0-ge jetkizip, Bıllı Djın Kıng kýbogynyń (komandalyq álem chempıonaty) fınaldyq kezeńine joldama aldy.