Qaraǵandyda kópqabatty úıdiń besinshi qabatynan eki jasar qyz qulap ketti, dep habarlaıdy Egemen.kz.
«Oqıǵa Gogol kóshesinde boldy. 2019 jyly týǵan qyz bes qabatty úıdiń terezesinen abaısyzda qulap aýrýhanaǵa jetkizildi», dep habarlady Qaraǵandy oblysy TJD baspasóz qyzmeti.
Dárigerlerdiń bergen aqparaty boıynsha, kishkentaı qyzdyń aıaq-qol súıekteri synǵan. Jaǵdaıy óte aýyr.
Sonymen qatar Qaraǵandy oblysynyń TJD ata-analardy balalarǵa muqııat bolýǵa jáne olardy ashyq terezelerde qaraýsyz qaldyrmaýǵa shaqyrady.
«Qulaý jaǵdaılarynyń kópshiligi ata-analar balalaryn qaraýsyz qaldyrǵan kezde bolady. Eshqashan moskıt torlaryna senbeńiz. Olar qulaýdan qorǵaýǵa arnalmaǵan. Múmkindiginshe, terezelerdi tómennen emes, joǵarydan ashyńyz. Jeldetý kezinde balanyń baqylaýynda ekenine kóz jetkizińiz. Balalardyń balkonǵa eresekterdiń qaraýynsyz shyǵýyna jol bermeńiz», delingen habarlamada.
Aıana Toǵanbek