Atalǵan rýhanııat jármeńkesi Nur-Sultan qalasyndaǵy EKSPO Halyqaralyq kórme ortalyǵynda bastaldy. Halyqaralyq Túrki akademııasynyń prezıdenti Darhan Qydyráli, Túrkııanyń Qazaqstan Respýblıkasyndaǵy Tótenshe jáne ókiletti elshisi Ýfýk Ekıdje, Qazaqstan Jazýshylar odaǵynyń basqarma tóraǵasy, aqyn Ulyqbek Esdáýlet, Qazaqstan Respýblıkasy Mádenıet jáne sport mınıstrligi Arhıv isteri jáne qujattamany basqarý komıtetiniń tóraǵasy Qýat Borash jáne Reseı Kitap baspagerleri qaýymdastyǵynyń prezıdenti Konstantın Chechenev saltanatty ashylý rásimine qatysyp, aıtýly sharany ashyp berdi.
Bul kitap jármeńkesin bas bolyp uıymdastyrǵan «Folıant» baspasy ekenin aıta ketken jón. Atalǵan is-sharaǵa bul baspadan syrt elimizdegi KS Production, Qasym baspa úıi, Qyr Balasy qoǵamdyq qory, Steppe&World baspa úıi, «Atamura» korporasııasy, «Mazmundama» qoǵamdyq qory sııaqty baspalardyń ártúrli janrdaǵy kitaptary men Reseılik A+A baspa ortalyǵy, Alter Ego, «Belyı gorod» saýda úıi qatarly 20-dan astam baspa uıymdary qatysty. Sondaı-aq Túrkııalyq Damla Publishing baspasy, Iran Islam Respýblıkasynyń Qazaqstan Respýblıkasyndaǵy Elshiliginiń mádenı bólimi qatarly alystan kelgen kitap baspa ortalyqtary da óz ónimderin kórme aıasynda oqyrmanǵa kórsetti.
Kórmeni uıymdastyrýshy «Folıant» baspasy qazaq redaksııasynyń bas redaktory Farıda Rahymjanqyzy: «Bul kitap jármeńkesi 2016 jyldan beri ótkizilip keledi. Pandemııaǵa baılanysty eki jyl toqtap qalyp edi, bıyl mine taǵy da uıymdastyryp otyrmyz. «Folıant» baspasy kitap naryǵynda 25 jyldan beri jumys istep keledi. Osy jyldardyń ishinde halyqaralyq kitap jármeńkelerine qatysyp júr. Álemdik kórmelerge qatysý barysynda nege bizdiń elde osyndaı kitap kórmesin ótkizbeske degen oıdyń jetegimen osyndaı kórmeni ótkizýdi qolǵa aldy. Bul kórmeniń maqsaty – osy kitap naryǵyndaǵy barlyq uıymdardy, baspagerlerdi, aqyn-jazýshylardy bir alańǵa jınaý, sheteldik jáne qazaqstandyq baspalardyń arasynda yntymaqtastyq ornatý» degen pikirimen bólisti. Osy kórme-jármeńke aıasynda Ulyqbek Esdáýlettiń «Kıiz kitaby» men Aqberen Elgezektiń «Bolmaǵan balalyq shaq» kitaby avtorlardyń óz qoltańbasymen oqyrmanǵa satyldy. Sonymen birge, tarıh ǵylymdarynyń doktory, professor Erlan Sydyqovtyń «Uly dala qundylyqtary», jazýshy Mádı Aıymbetovtiń «Bopaı hanym» atty romanynyń, «Atamura» baspasynan shyqqan «Balalar poezııasynyń antologııasy» sekildi kitaptardyń tanystyrylymy ótti.
Osy kórmege qatysqan Steppe & World baspa úıiniń dırektory Raısa Saıran Qadyr: «Qazaq baspa ındýstrııasy damyp, ilgerilep kele jatqanyna qýanyshtymyn. Jas urpaq úshin bul óte mańyzdy. Elimizdiń jazýshylarynyń kitaptary jáne álem ádebıeti qazaq tilinde molymen shyqqany kúndelikti normaǵa aınalýy tıis. Balalar álem ádebıetin ana tilinde oqý quqyǵyn talap etýi kerek. Osy kórmeni uıymdastyrýǵa at salysqan áriptes «Folıant» baspasyna alǵysymdy bildiremin», dedi. Atalǵan kitap kórme-jármeńkesi 20-24 sáýir aralyǵynda jalǵasady. Árıne, osyndaı ıgilikti is-sharany uıymdastyryp, búkil shyǵynyn óz moınyna alǵan «Folıant» baspa úıine alǵystan basqa aıtarymyz joq. Kitabymyz kóp bolsyn, kitap oqıtyndardyń qatary sıremesin.