Qarjy qyzmetterin tutynýshylardyń quqyǵyn qorǵaý jáne qaryz alýshynyń nesıe tarıhyn jaqsartý maqsatynda Qarjy naryǵyn retteý jáne damytý agenttigi Memlekettik nesıe bıýrosy jáne Birinshi nesıe bıýrosymen birige otyryp, qashyqtan basqarý prosesin iske qosty. Nesıe tarıhyndaǵy aqparatqa qatysty kúmán keltirý prosesin fingramota.kz medıaportalynda iske asyrýǵa bolady.
Osy prosesti Memlekettik nesıe bıýrosynyń resmı saıtyndaǵy «Aqparatty qalaı daýlaýǵa bolady» jáne Birinshi nesıe bıýrosy saıtyndaǵy «Aqparatty daýlaý» bólimderi arqyly júzege asyrýǵa múmkindik bar. Qyzmet tegin usynylady. О́tinim qabyldaý onlaın túrde iske asyp, ótinim 15 jumys kúni ishinde qarastyrylady. Kredıtordan tıisti jaýap kelgennen keıin ótinim berýshige nesıe bıýrosy tarapynan qajetti nátıje (jaýap) jiberiledi. Eger qate aqparat anyqtalsa jáne nesıe berýshi túzetýler engizse, bul ózgerister ótinish berýshiniń nesıelik esebinde kórsetiledi.
Jeke nesıe esebinde kórinis tabatyn aqparatty daýlaý oqıǵalary mynadaı: Nesıe tarıhynda ótelgen tólem keshiktirildi dep kórsetilse; Jabylǵan kelisimshart boıynsha qaryz bary anyqtalsa; Alaıaqtyq jolmen ótinish berýshiniń atynan nesıe rásimdelse; Eger kredıttik esepte ótinish berýshi kelisim bermegen uıymnyń kredıttik tarıhty alý týraly ótinishin kórgen bolsa; Jeke derekter ishinde durys emes aqparattar júrse; Ońaltý erejeleriniń talaptaryna sáıkes keletin qaryz sharttary boıynsha «ońaltý» mártebesi bolmaǵan jaǵdaıda.
Eger siz jeke nesıe esebinde kórsetilgen qandaı da bir aqparatpen kelispeıtin bolsańyz, Birinshi nesıe bıýrosyna (nemese Memlekettik nesıe bıýrosyna) aryzdana alasyz. Ol úshin fingramota.kz saıtyndaǵy arnaıy forma arqyly jeke derekter – JSN jáne telefon nómirin engizesiz. Daýlasý úshin merzimi 15 kúnnen keshikpegen ózekti nesıe esebin alýyńyz qajet. Ony da Memlekettik nesıe bıýrosynan (id.mkb.kz) nemese Birinshi nesıe bıýrosynan (www.1cb.kz) suraı alasyz. Jeke nesıe esebi jylyna bir márte tegin beriledi.
Nesıe tarıhyndaǵy daýlaý mártebesin Memlekettik nesıe bıýrosynyń korporatıvti WhatsApp chaty (+7 701 485 08 34) nemese Birinshi nesıe bıýrosyndaǵy jeke kabınet arqyly qadaǵalap otyrýǵa múmkindik qarastyrylǵan.