Qostanaı-Áýlıekól-Surǵan tas jolyndaǵy qaıǵyly oqıǵaǵa qatysty sotqa deıingi tergeý amaldary bastaldy, dep habarlaıdy Egemen.kz.
Jol apaty týraly aqparatty Qostanaı oblysy Polısııa departamentiniń bastyǵy Erlan Omarbekov Facebook jelisindegi paraqshasyna jarııalady.
20 sáýir kúni saǵat 22:25-te Áýlıekól aýdanynyń polısııa bólimine Qostanaı-Áýlıekól-Surǵan avtojolynyń 72-shaqyrymynda kólik apaty bolǵany týraly habarlama túsken.
Reseılik tirkeýdegi «Toıota Estıma» kóligin tizgindegen jitiqaralyq 26 jastaǵy júrgizýshi elordaǵa baǵyt alǵan. Kenet ol rólge ıe bola almaı, joldyń qarsy betinde kele jatqan «KamAZ»-dyń tirkemesine soǵylǵan. Júk kóliginiń rólinde Qostanaı qalasynyń 28 jastaǵy turǵyny bolǵan. Apat saldarynan «Toıota Estıma» júrgizýshisi jáne eki jolaýshy oqıǵa ornynda qaza tapty. Jeńil kóliktiń taǵy bir jolaýshysy aýyr jaralanyp, Áýlıekól aýdany aýrýhanasyna jetkizildi. Qazir jan saqtaý bóliminde jatyr.
«Jol apaty bolǵan jerge bardym. Qazirgi ýaqytta «Abaısyzda eki jáne odan da kóp adamnyń ólimine ákep soqqan JQE buzý» baby boıynsha sotqa deıingi tergeý aıasynda apattyń sebepterin anyqtap jatyrmyz. Apat sebepterin anyqtaý úshin barlyq qajetti saraptama taǵaıyndaldy», dep jazdy Erlan Omarbekov.