Álemdik arenalarda el namysyn abyroımen qorǵap júrgen «Qaırat» fýtzal klýby kezekti ret Qazaqstan birinshiliginde dara shyqty. Chempıonattyń 31-32 týr oıyndaryn syrt alańda «Atyraýmen» ótkizgen almatylyq ujym alań ıelerinen eki matchta da basym túsip, merziminen buryn chempıondyq tájge qol jetkizdi.
30-týr oıyndarynan keıin 65 upaı jınaǵan «Qaırat» týrnır kestesinde ekinshi orynda kele jatqan «Aıattan» (Rýdnyı) 8 upaıǵa uzap ketti. О́tken eki týrda «Aıat» birinshilikte úzilis alyp, «Qaırat» mańyzdy eki oıynda alty upaıǵa qol jetkizgen soń, qalǵan tórt týrda qostanaılyqtardyń «Qaıratty» qýyp jete almaıtyny belgili boldy.
Atyraýda ótken alǵashqy oıynda qonaqtar 4:1 esebimen senimdi túrde jeńiske jetti. 2-mınýtta kezdesýdiń esebin ashqan Albert Aqbalyqov 22 jáne 25-mınýttarda het-trıktiń avtory atanyp, tablodaǵy kórsetkishti 3:0-ge jetkizdi. 34-mınýtta «Atyraý sapynan Nursultan Mádıev penaltıdi sátti oryndap, esep aıyrmasyn qysqartty. Matchtyń aıaqtalýyna eki mınýt qalǵanda Shyńǵys Esenamanov mergendigimen kózge túsip, oıynnyń núktesin qoıdy – 4:1.
Ekinshi kúngi kezdesýde almatylyqtar match pen chempıondyqtyń taǵdyryn birinshi taımnyń ózinde-aq sheship tastady. 9-mınýtta «Qaırattyń» reseılik legıoneri Andreı Grafskıı gol soqsa, artynsha 2021 jylǵy Qazaqstannyń úzdik oıynshysy Dáýren Tursaǵulov esepti eseledi. Al 32-mınýtta alystan tamasha soqqy jasaǵan A.Grafskıı dýbldiń avtory atandy. Match sońynda atyraýlyq Baýyrjan О́mirbaev kezekti aıyp soqqysynan keıin álemniń bes dúrkin úzdik qaqpashysy Igıtany qapy qaldyryp, ádemi gol soqty – 3:1. Osylaısha eki oıynda mańyzdy alty upaıǵa qol jetkizgen «Qaırat» 71 upaımen «Aıatpen» aradaǵy upaı sanynyń aıyrmashylyǵyn 14-ke jetkizdi.
Al eki oıynda bir-birden gol soqqan «Atyraý» kezekti ret jeńilip, kúmis júldeden kúderin úze bastady. Ázirge atyraýlyqtar ekinshi oryndaǵy «Aıattan» úsh upaıǵa qalyp tur. Alaıda Rýdnyı komandasy «munaıshylarǵa» qaraǵanda eki oıyn kem ótkizgen. Eger «Aıat» aldaǵy demalys kúnderi ótetin kezekti týrda elordanyń «Nur-Sultan» komandasynan eki matchta da upaı alatyn bolsa, onda «Atyraý» ekinshi orynnan úmitin úzedi degen sóz. Sóıtip chempıonatta «Atyraý» men «Kaspıı» arasynda úshinshi orynǵa talas qyza túspek. О́ıtkeni «Atyraýdan» jeti upaıǵa qalyp turǵan «Kaspıı» tórtinshi orynda keledi. Sondaı-aq aqtaýlyq komandanyń enshisinde qosymsha taǵy eki oıyny bar.
«Kaspıı» kelesi týrda eski de jańa el chempıondary – «Qaıratpen» kezdesedi. Bıylǵy tapsyrmany merziminen buryn oryndaǵan almatylyq komanda bul oıynda alańǵa jas ári qajetti deńgeıde oıyn tájirıbesine ıe bola almaı júrgen fýtzalshylaryn shyǵaratyny anyq. Sondyqtan «Kaspııge» úshinshi orynǵa kóterilýge tamasha múmkindik týyp tur. Aqtaýlyqtar ótken týrda týrnır kestesinde besinshi orynda turǵan «Aqtóbemen» kezdesip, alǵashqy oıynda 9:4 esebimen basym tússe, ekinshi oıynda teń esep tirkeldi – 4:4.
Altynshy oryndaǵy Oraldyń «Báıterek» klýby men segizinshi satydaǵy Aqtóbeniń «Rahmeti» bir-birden jeńiske jetse, «Nur-Sultan» (№7) men «Oqjetpes» (№9) klýby arasyndaǵy eki oıynda da elordalyqtardyń mereıi ústem boldy (6:4, 6:0). Týrnır kestesinde sońǵy orynda qalyp qoıǵan Kókshetaý komandasy bıylǵy chempıonattyń pleı-off kezeńinen tys qaldy. Endi aldaǵy tórt týrda ekinshi jáne úshinshi oryn ıegerleri men shırek fınaldyń juptary belgili bolmaq.