Nur-Sultanda 22 sáýirden bastap ruqsat etilmegen oryndarda kólik qoıý polısııa qyzmetkerleriniń qatysýynsyz avtomatty túrde tirkeledi, dep habarlaıdy Egemen.kz.
Elorda joldaryndaǵy quqyqbuzýshylyq deńgeıin tómendetý maqsatynda «Parkovochnoe prostranstvo Astany» JShS-niń arnaıy «Dozor-M» foto-beıne jazba keshenderiniń kómegimen kólikterdiń toqtaýy jáne júrýi tirkeletin bolady.
«Dozor-M» keshenderi zańnamaǵa sáıkes mindetti sertıfıkattaýdan jáne tirkeýden ótti. Belgilenbegen jerden avtokólikterdi tabý faktilerin, kóliktiń naqty ýaqyty men ornyn anyqtaý jáne tirkeý GPS/GLONASS júıesi arqyly júzege asyrylady», dep habarlady kompanııa.
Júrgizýshilerge kólik quraldaryn durys qoımaý, ruqsatsyz jerge qoıý erejelerin buzýǵa jol bergeni úshin ÁQBtK-niń 597-baby boıynsha 5-ten 10 AEK-ke deıin aıyppul túrinde jaýapkershilik kózdelgen.
Kompanııada kólikti belgilenbegen jerde qoıý jáne turaqqa durys qoımaý quqyq buzýshylyqtyń jıi kezdesetin túrleriniń biri, sondyqtan jol qozǵalysy jaǵdaıyn qıyndatady. Jańashyldyq jol qozǵalysyna qatysýshylar arasyndaǵy quqyq buzýshylyqty azaıtyp, júrgizýshilerdiń tártibin jaqsartady dep kútiledi.
«Júrgizýshiler arasyndaǵy quqyq buzýshylyqtyń sanyn azaıtý maqsatynda Nur-Sultan qalalyq IIB Ákimshilik polısııa basqarmasynyń usynysy boıynsha buzýshylyqtardy túzetý jumystary júrgizildi. Daýly isterdi polısııa qyzmetkerleri qaraıdy. Aıyppuldan túsken barlyq qarajat qala bıýdjetine túsedi», dep túsindirdi kompanııa.